DILI, 16 Jullu 2025 (TATOLI)-Komandante Operasaun Komandu Polísia Nasionál Timor-Leste (PNTL) Munisípiu Dili, Superintendente Asistente Polísia Luis Amaral, hateten Komandante Jerál PNTL hasai ona diretiva ba Komandu PNTL munisípiu hotu katak seguransa ba eventu jogu desportivu komunidade ba Nasaun sira ne’ebé ko’alia lian-portugés (CPLP, sigla portugés) ho seguransa alerta-ida.
Nia dehan, tanba ne’e Komandu munisípiu Dili kumpre ba diretiva ida-ne’e hodi mobiliza rekursu tomak ne’ebé iha atu fó seguransa ne’ebé másima ba jogu desportivu CPLP.
“Ha’u hanoin planu operasaun ba jogu desportivu CPLP ne’e ami hasai ona, diretiva maihusi Komandu Jerál ne’e klaru ona. Tanba ne’e fatin sira ne’ebé mak delegasaun sira atu hela ba, liuliu otél sira, rezidensia ne’ebé ita-nia, VIP hela, ami aseguradu inklui fatin estádiu, jináziu no volipraia ami sei fó seguransa másimu ba fatin sira ne’e ita sei koloka ita-nia membru sira hotu”, Luis hateten ba TATOLI iha Tribunál Judisiál Primeira Dili, kuarta semana-ne’e.
Nia dehan, rekursu ne’ebé Komandu PNTL munisípiu Dili hatún hodi fó susesu ba eventu ne’e. “Ha’u labele fó hateten ba ita-boot sira membru PNTL Munisípiu Dili hira mak ita sei hatún, maibé ein-prinsipiu ita sei hatún rekursu hodi apoia jogu desportivu CPLP, nune’e eventu bele la’o di’ak”.
Luis husu ba joven no komunidade tomak atu fó apoiu tomak ba polísia, hodi fó susesu ba eventu ne’e.
Notísia relevante: Komandu PNTL hahú enkontru hodi asegura jogu CPLP
Jornalista : Natalino Costa
Editora : Rita Almeida
