Komemora Loron Nasionál FP, Dom Leandro husu funsionáriu halo reflesaun

VIKEKE, 15 Jullu 2025 (TATOLI)—Komemorasaun Loron Nasionál Funsaun Públika (FP) ba dala-11, Bispu Dioseze Baukau, Dom  Leandro Maria Alves husu funsionáriu públiku idak-idak atu halo reflesaun ba servisu sira-ne’ebé loron-loron hala’o iha fatin servisu.

“Ohin selebrasaun misa ho intesaun ba ema sira-ne’ebé ezerse funsaun iha Funsaun Públika nu’udár servidór mákina, hahú husi na’in-ulun nasaun nian to’o iha administrasaun públika Estadu nian ba ita-nia sosiedade no nasaun doben ida-ne’e.  Momentu ida-ne’e nu’udár momentu importante atu ita hotu reflete hamutuk kona-ba ita idak-idak nia papél,” Dom  Leandro hateten iha ninia omília iha misa agradesimentu Loron FP, iha Igreja Imaculada da Conceição Vikeke, Tersa ne’e.

Bispu enkoraja funsionáriu sira atu kontinua sakrifika aan tuir eroi sira-nia ain fatin hodi serbí nasaun, onestidade, fiar malu, responsabilidade, dedikasaun no hadomi nasaun Timor-Leste ka sai ema nasionalista.

Iha biban hanesan, Prezidente Komisaun Organizadora atuál Ministra Finansa (MF), Santina José Rodrigues F. Viegas Cardoso haktuir selebrasaun ida-ne’e ezije funsionáriu sira atu halo reflesaun ba kna’ar sira no hanesan ajente administrasaun públika tenke presta serbisu ne’ebé ho kualidade no eselente  atu  serbí populasaun.

“Ha’u hanoin katak administrasaun públika ita ko’alia kona-ba servidór públiku. Oinsá ita halo serbisu di’ak liután, besik liután ba povu. Nune’e, husu ba funsionáriu públiku sira ita hamutuk hodi kumpri orientasaun hodi halo servisu ho kualidade. Ha’u hakarak hato’o parabéns ba funisionáriu sira hotu no komunidade ne’ebé partisipa selebrasaun Loron Funsaun Públika iha Munisípiu Vikeke,” governante ne’e hato’o.

Hafoin misa agradesimentu, governante, Autoridade Munisípiu Vikeke, funsionáriu no komunidade lori ai-funan no lilin ba Jardín Eroi Kraras ho presta omenajen ba eroi sira no funsionáriu sira-ne’ebé fila ona ba Aman Maromak nian kadunan santu.

Iha selebrasaun misa ne’e, partisipa husi  membru Governu, Prezidente Komisaun Funsaun Públika (KPF),  Prezidente Komisaun Nasionál Eleisaun (CNE-sigla portugeza), veteranu, funisionáriu husi liña ministeriál, funsionáriu, autoridade lokál no komunidade.

Jornalista: Vitorino Lopez da Costa

Editór: Xisto Freitas da Piedade