Komunidade prefere Governu halo aprosimasaun molok alarga estrada
DILI, 16 Jullu 2025 (TATOLI)–Abitante afetadu husi Aldeia Nato, Suku Kuluhun, Postu Administrativu Kristu Rei, Munisípiu Dili, Anibal da Silva Martins informa Governu halo dezenvolvimentu ba nasaun ida, hanesan komunidade suku no aldeia, prontu koopera ho Governu maibé presiza halo aprosimasaun molok alarga estrada.
“Buat ida importante mak Governu tenke halo negosiasaun no esplika klaru mai ami. Labele hanesan ohin sira mai ho karreta avizu de’it sé nia uma mak tau sinál mean haree prepara sobu daudaun ona tanba eskavadora atu mai dudu. Liafuan ne’e halo ami tensaun no sente ami ne’e la vale ida,” nia dehan ba jornalista iha Aldeia Nato, Kuarta ne’e.
Nia esplika ekipa konjunta Governu nian mai iha loron 04 Juñu ne’e tau markasaun iha kalan boot, iha-ne’ebbé komunidade lahatene. Markasaun ida-ne’e mai nonook de’it sein koñesimentu hosi uma-na’in.
“Ami hadeer-mai tuku 5h00 mak haree markasaun ne’e iha tiha ona. Ami hakfodak. Ha’u hanesan na’in ba uma sente la satisfáz tanba sira daudaun ne’e foti metru tolu (3) ona, aumenta tan metru 3,50 mai ami-nia uma. Ami sente hanesan laiha balansu liu, tanba estrada ne’e tenke kona ka ko’a hosi sorin loos no sorin karuk para hotu-hotu ita sente justu duni,” nia deskorda.
Nia akresenta durante ne’e ekipa halo enkontru ho komunidade dala ida de’it to’o agora. Ohin ekipa mai avizu dehan hamamuk fatin, komunidade sente-aan la vale ona.
Entretantu, Sekretáriu Estadu Asuntu Toponímia Organizasaun Urbana (SEATOU), Germano Santa Brites Dias hateten loke dalan (estrada) ida-ne’e atu fasilita komunidade ne’ebé hela iha-laran.
“Ho servisu ki’ik-oan sira-ne’e, ita bele ajuda loke netik dalan nune’e ita-nia maluk sira hela iha-laran bele asesu bá estrada hodi lori sira-nia produtu sai. Sira presiza rai-henek ka fatuk karik labele fakar iha estrada, maibé bele lori tama to’o sira-nia uma oin,” nia esplika.
Governante ne’e hatutan levantamentu ida-ne’e tuir loloos la’o ona iha tinan kotuk tanba markasaun sira-ne’e Ministériu Obra Públika tau tiha ona maibé falta balun mak seidauk tau markasaun.
“Entaun, tuir loloos, ohin ne’e ita sobu ba fatin ne’ebé ita halo ona levantamentu maibé sira seluk seidauk halo levantamentu entaun ohin konklui tiha lai. Ne’ebé, ohin loron tomak esforsu halo levantamentu nune’e aban-bainrua mákina boot mai loke dalan hosi ne’e ba to’o Bemori nian para komunidade hosi laran ne’e bele asesu,” nia dehan.
Nia adianta katak seidauk iha dadus uma-kain serteja ba afetadu alargamentu Bemori to’o Kuluhun nian maibé uma-kain ne’e la to’o 100. Tanba sira-ne’ebé iha dalan ninin mak kona maibé la barak, iha uma ida ka rua de’it.
“Ohin ha’u mai abitante ida ka rua mak kestiona. Ida-ne’e sira-nia direitu. Maibé, dezenvolvimentu atu la’o ne’e presiza kontribui. Nune’e, povu ki’ik sira bele asessu ba estrada,” Germano informa.
Tuir Sekretáriu Estadu katak estrada ne’e nia luan iha liman-loos metru 3,5 no liman-karuk metru 3,5, hamutuk metru 7, nia naruk metru 800.
Jornalista : Osória Marques
Editora. : Julia Chatarina
