VIKEKE, 16 Jullu 2025 (TATOLI)—Prezidente Kooperativa Uniaun Kréditu Brigada Fitun Foinsa’e (UKBFF) iha Munisípiu Vikeke, Augusto Pinto hateten Kooperativa UKBFF benefísia ona membru sira.
“Ami-nia kooperativa nia ezisténsia iha Munisípiu Vikeke agora daudaun iha progresu no membru barak benefisia ona husi kooperativa ne’e liuhusi asesu ba kréditu,” Augusto Pinto ba TATOLI, iha Beobe, Vikeke, Kuarta ne’e.
Kona-ba rendimentu, Prezidente Kooperativa UKBFF ne’e haktuir katak rendimentu kooperativa UBFF kada tinan fahe ba membru sira-ne’ebé depózita ona sira-nia orsamentu iha kooperativa. Rendimentu ne’e bazeia filafali ba membru sira, katak depózita osan boot sei hetan rendimentu boot, depózita natoon sei hetan mós natoon.
“Iha tinan kotuk ami fahe rendimentu ne’e iha membru na’in ida mak funan boot ($120), maioria hetan $80. Rendimentu ki’ik liu mak $25.00. Envolve iha kooperativa membru sira hetan benefísiu rua mak hanesan kréditu fásil no fasilita membru sira-nia oan sira-ne’ebé eskola iha universidade liuhusi kréditu hodi sustenta ba membru sira-nia oan hala’o estudu iha banku universidade no hadi’a ekonomia família. Daudaun ne’e ami-nia fundu totál $30.000,00-resin,” Augosto esplika.
Notísia relevante: Kooperativa haat iha Viqueque nia kapitál atinji rihun $91
Nia hatutan, kooperativa UKBFF iha ona ninia edifísiu rasik ne’ebé apoia husi parseiru Catholic Relief Services (CRS).
“Ami eziste tinan tolu ona. Ami iha estatutu ne’ebé rejistu ona iha Ministériu Justisa no hetan ona legalidade hanesan kooperativa iha Vikeke. Ami mós iha rejimentu interna, rejimentu operasaun no polítika kréditu. Ami-nia desizaun ne’e koletiva katak desizaun maihusi membru sira-ne’ebé iha estrutura kooperativa, hodi ezekuta no halo jestaun,” nia realsa.
Nia dehan durante ne’e Kooperativa UBFF halo koperasaun ho Sekretsris Estadu Kooperativa (SEKOOP) munisípiu no nasionál no apoiu sira-ne’ebé SEKOOP oferese ba Kooperativa UBFF mak hanesan apoia téknika formasaun kona-ba halo relatóriu, kontablidade no lideransa.
“Maski durante ne’e SEKOOP seidauk fó apoiu materiál, maibé sira fasilita ona formasaun kona-ba jestaun koopertiva. Dezafiu ne’ebé durante ne’e ami hasoru mak menus fasilidade hanesan kadeira, komputadór inklui fasilidade sira seluk. Maibé, ami kontinua esforsu hodi lori koopertivu ida-ne’e tanba ami-nia esperansa hakarak sai kooperativa ida-ne’ebé forte, fundu ne’ebé boot hodi fó kréditu ba ba membru sira, hodi kontribu ba dezenvolvimentu ekonomia iha Munisípiu Vikeke,” nia hato’o.
Daudaun ne’e, membru membru kooperativa ne’e hamutuk na’in-89. Husi númeru ne’e, maioria foinsa’e mak envolvidu.
Iha fatin ketak, Sekretáriu Estadu Kooperativa, Arsénio da S. Pereira hateten SEKOOP kontinua apoia kapasitasaun no fasilidade eskrítóriu nian ba Kooperativa Krétidu sira-ne’ebé eziste iha Munisípiu Vikeke.
“Bá-oin ami sei kontinua apoia kooperativa kréditu sira, maibé la’ós apoiu fundu. Ami apoia kapasitasaun no fasilidade ba eskritóriu nian atu sira bele uza. Governu nia prezensa ne’e fasilita, enkuantu kooperativa sira nesesita hanesan treinamentu, estudu komparativu sira, depende pedidu husi kooperativa sira,” nia hato’o.
Jornalista: Vitorino Lopez da Costa
Editór: Xisto Freitas da Piedade
