DILI, 16 Jullu 2025 (TATOLI)—Ministru Transporte no Komunikasaun (MTK), Miguel Marques Gonçalves Manetelu, kuarta ne’e, aprezenta relatóriu preliminár husi Organizasaun Internasionál Aviasaun Sivíl (ICAO) iha ámbitu Programa Universál Auditoria Seguransa- Abordajen Kontrolu Kontinua (USAP-CMA) ba Governu liuhusi reuniaun Konsellu Ministru (KM), kuarta ne’e.
Organizasaun Internasionál Aviasaun Sivíl (ICAO) hanesan ajénsia espesializada husi Nasaun Unida ne’ebé harii iha tinan 1944, iha misaun atu promove dezenvolvimentu seguru no sustentável husi aviasaun sivíl internasionál liuhusi define padraun globál no hametin kooperasaun entre Estadu sira.
Antes ne’e mós iha loron 14-17 Abríl 2025, Ministru Transporte no Komunikasaun, Miguel Marques Gonçalves Manetelu, partisipa iha konferénsia ne’ebé organiza husi Organizasaun Internasionál Aviasaun Sivíl (ICAO, sigla inglés) 2025 iha Doha-Katár.
Konferénsia ne’e ho tema Fasilita Futuru Transporte Aéreu: Kolaborasaun, Efisiénsia, Inkluzividade. Aliña tebes ho Timor-Leste nia vizaun nu’udar nasaun joven ne’ebé haka’as-aan atu integra kle’an liután iha ekosistema aviasaun globál.
“Ida-ne’e hanesan onra no priviléjiu ida atu ko’alia ba distintu asembleia ida-ne’e iha konferénsia ICAO 2025. Hodi Governu Repúblika Demokrátika Timor-Leste nia naran, ha’u hakarak hato’o ami-nia apresiasaun sinséru ba Estadu Katár, ba ninia konvite no ba ospitalidade jeneroza ne’ebé hato’o mai ha’u no ha’u nia delegasaun durante ami-nia estadia iha Doha,” Ministru Transporte no Komunikasaun, Miguel Marques Gonçalves Manetelu, hato’o iha-nia diskursu ne’ebé Agência Tatoli asesu liuhusi nota.
Ministru hateten, prezensa TL reafirma dedikasaun atu kumpre obrigasaun tuir enkuadramentu ICAO nian liuliu iha área ne’ebé bele fasilita tuir aneksu sia (9), sira serbisu maka’as atu aliña ami-nia sistema no prosesu nasionál sira ho norma internasionál hodi garante prestasaun viajen aéreu ne’ebé seguru, efisiente no laiha problema ba pasajeiru hotu-hotu.
“Ami mós aproveita oportunidade ida-ne’e espresa am-nia apresiasaun ba ami-nia parseiru, inklui Ajénsia Seguransa Aviasaun Uniaun Europeia nian (EASA, sigla portugés) no parte interesada internasionál seluk, ba sira-nia kompromisu no kolaborasaun ne’ebé la’o hela,” nia hateten.
Bazeia ba dokumentu ne’ebé Agência Tatoli asesu iha portál Governu, USAP-CMA, organizasaun ne’e kontinua avalia nasaun sira-nia kumprimentu ba norma seguransa aviasaun nian, identifika frakeza sira no apoia ninia korresaun.
Iha aprezentasaun, destaka rezultadu prinsipál sira husi auditória no mós asaun no rekomendasaun sira-ne’ebé atu implementa hodi hadi’a kondisaun seguransa aviasaun sivíl nasionál.
Jornalista : Alexandra da Costa
Editór : Cancio Ximenes
