VIKEKE, 15 Jullu 2025 (TATOLI)—Polísia Nasionál Timor Leste (PNTL) Munisípiu Vikeke fó pose ba membru Konsellu Polisiamentu Komunitáriu (KPK) hamutuk na’in-42 hodi apoia seguransa.
Iha serimónia tomada pose ne’e, reprezentante Komandante PNTL Munisípiu Vikeke atuál Komadante Operasionál, Asistente Superintendente Polísia, José Afonso esplika formasaun ba membru KPK ne’e importante ba suku no postu hodi asegura seguransa iha rai-laran liuliu iha Suku Makadiki de Cima, Postu Administrativu Uatulari, Munisípiu Vikeke.
“Atu asegura seguransa ita mak tenke hamutuk. Ita hakarak dezenvolvimentu mai iha ita-nia suku, primeiru tenke situasaun hakmatek. Situsaun hakmatek la’ós PNTL de’it mak segura, maibé PNTL ninia parseiru KPK sira-ne’ebé estabelese ona iha suku sira,” José Afonso ba TATOLI iha sede Suku Makadiki de Cima, Tersa ne’e.
Nune’e, nia husu ba membru KPK Suku Makadiki de Cima tenke kolabora ho PNTL hodi kontrola seguransa sira iha suku laran.
Iha fatin hanesan, reprezentante The Asia Foundation, Adélio Tilman haktuir The Asia Fundasaun kongratula PNTL tanba estabelese KPK iha Suku Makadiki de Cima.
“The Asia Fundasaun hahú tinan 2009 servisu besik liu Governu liuhusi Ministériu Interiór (MI). Ita kontinua apoia ita-nia polísia hodi promove servisu polísia nian ne’ebé forte mak liuhusi KPK. Ita haree katak PNTL liuliu MI hanoin hela oinsá mak fortifika di’ak liután atu estabiliza estabilidade iha suku,” nia hato’o.
Iha biban ne’e, Xefe Suku Makadiki de Cima, Afonso dos Reis hato’o agradesimentu ba PNTL tanba oferese ona formasaun ba membru KPK sira iha Suku Makadiki de Cima durante loron tolu no konsidera katak estabelesimentu KPK sai fatór importante hodi kontrola seguransa ba komunidade.
Membru KPK ba Suku Makadiki de Cima kompostu husi xefe suku, xefe aldeia, lia-na’in, juventude feto no mane ho totál hamutuk na’in-42.
Tuir dadus, Suku Makadiki de Cima iha aldeia ualu (8), totál uma-kain 420 no totál abitante hamutuk na’in-600.
Iha serimónia tomada pose ba membru KPK Suku Makadiki de Cima ne’e, hetan partisipasaun husi autoridade lokál, Komandante PNTL Eskuadra Uatulari, veteranu no komunidade Suku Makadiki de Cima.
Jornalista: Vitorino Lopez da Costa
Editór: Xisto Freitas da Piedade
