DILI, 16 Jullu 2025 (TATOLI)—Diretora Ezekutiva Institutu Nasionál Farmasia Produtu Medikamentu (INFPM), Paulina Mendonça Maher, hateten prosesamentu akizasaun produtu médiku ba tinan 2025 tenke hetan autorizasaun husi Ministra Saúde.
“Ita-boot sira hakarak hatene kona-ba prosesamentu akizasaun produtu médiku ba 2025 tenke halo karta pedidu ida ba Ministra Saúde hatán mak ami foin fó informasaun,” Paulina Mendonça Maher hateten ba jornalista sira, bainhira jornalista sira atu konfirma asuntu estoke ai-moruk sira iha armajen INFPM, ohin.
Nia dehan, kona-ba empreza sira-ne’ebé mak sosa ai-moruk ne’e mídia ka sosiedade la presiza atu hatene no halo pedidu ba Ministra Saúde mak foin bele hatene.
“Empreza sé mak manán konkursu públiku ne’e ita-boot sira la presiza hatene. Se hakarak hatene mak tenke halo pedidu ba ami-nia Ministra Saúde. Nia orienta mak ita-boot sira mai fila-fali,” nia dehan.
Hatán ba preokupasaun ne’e, Minsitra Saúde Elia dos Reis Amaral husu Diretora Ezekutiva Institutu Nasionál Farmásia Produtu Medikamentu INFPM tenke fó informasaun ba mídia sira liga ho kestaun ai-moruk no prosesamentu akizasaun produtu médiku tinan 2025 nian.
“Kona-ba estoke ai-moruk ne’ebé mak menus iha fasilidade saúde sira, mak ha’u haruka ita-boot sira bele ba intervista Diretora Ezekutiva INFPM, tanba nia mak hatene liu,” Elia dehan.
Jornalista : Feliciddae Ximenes
Editór : Cancio Ximenes
