DILI, 17 Jullu 2025 (TATOLI) – Atividade agrikultura integrada ne’ebé envolve joven sira iha Kongregasaun Ordo Carmelitarum Descalceatorum (OCD) iha Hera, konsege kolleta hare tonelada ualu.
Koordenadór atividade, Fernando Egídio Amaral, hateten atividade agrikultura integrada mak forma kuda modo-tahan, hare, haki’ak ikan no animál iha sistema ida. Atividade ne’e lansa iha 2024, hafoin fó formasaun no treinamentu ba joven sira. Rezultadu uluk ne’ebé hatudu mak hare kulit bokon ka ubinan tonelada 8,4, ne’ebé depoizde habai hetan tonelada 8.
Fernando dehan modelu agrikultura ida-ne’e bele replika ba iha área rurál seluk tanba nia kontribui ba seguransa alimentár, nutritivu no reziliénsia komunidade.
“Tanba iha ne’ebá ita introdús ona agrikultura integradu ida ne’ebé kuda modo-tahan, hare, ikan no haki’ak animál”, Fernando Amaral dehan ba Tatoli, ohin.
Nia dehan agrikultura integradu nia rezultadu daudaun seidauk bele fa’an ba merkadu, tanba utiliza de’it ba konsumu kongregasaun OCD no apoia maluk sira ne’ebé presiza. Planu ba tinan oin bele distribui ba merkadu.
Objetivu prinsipál mak fó oportunidade ba joven sira atu aprende agrikultura ne’e, no dudu kooperasaun ho Governu, parókia no dioseze atu estende ba área sira seluk.
Fernando subliña modelu ne’e bele sustenta merenda eskolár no ospitál sira ho ai-han nutritivu lokal.
“Neineik ita lori ona agrikultura ne’e sai husi prátika ida subsisténsia ba agrikultura ida ne’ebé mais orienta ba merkadu”, konklui.
Notisía relevante: Kongregasaun OCD lansa atividade agrikultura integrada iha Hera
Jornalista: Arminda Fonseca
Editora: Maria Auxiliadora
