VIKEKE, 08 Jullu 2026 (TATOLI)—Natar na’in husi Aldeia Makadike, Suku Uaitame, Postu Administrativu Uatulari, Munisípiu Vikeke, Alvino Pinto, hateten natar parte Borululi hamutuk ektare 50 agora sai abandonadu tanba irrigasaun uluk mota estraga tiha nune’e labele fornese bee ba natar.
“Natar parte Borululi ne’e agora sai abandonadu. Iha tinan kotuk Ministériu Agrikultura apoia ekipamentu pezadu normaliza tiha irrigasaun, ami konsege halo natar, maibé, iha tinan ida-ne’e labele halo tanba irrigasaun mota estraga totál. Iha-ne’e ha’u-nia natar besik ektare ida mak abandonadu.Tinan ida-ne’e ha’u la halo natar, halo de’it toos tanba natar ita halo bee laiha,” Alvino Pinto ba TATOLI iha natar Borululi, Kuarta ne’e.
Nia haktuir natar Borululi ne’e agrikultór balun halo hela, maibé uza udan-been, kuandu udan la mai bee laiha.
Iha fatin ketak, Xefe Suku Makadike Uaitame, José da Silva, informa natar Borului ne’e lokaliza iha Aldeia Keturai, Suku Makadike Uaitame nune’e natar ne’e komunidade Keturai mak halo, maibé irrigasaun mota estraga tiha nune’e agrikultór sira labele halo natar.
Nia esplika bainhira irrigasaun di’ak natar Borululi sei benefísia komunidade uma-kain 30 husi Aldeia Keturai, inklui komunidade Matahoi no Uatame ne’ebé hela besik iha natar Borululi.
Hatán ba preokupasaun ne’e, Diretór Servisu Ministériu Agrikultura, Peska, Pekuária no Floresta (SMAPPF), Olívio S. Freitas haktuir, kona-ba natar sira-ne’ebé abandonadu ne’e nia parte seidauk simu relatóriu ruma tanba ne’e mak seidauk normaliza irrigasaun ba natar Borululi.
“Natar Borululi ne’ebé agora abandonadu ne’e ha’u foin mak rona. Durante ne’e ema la aprezenta ba ha’u. Karik aprezenta ita bele mobiliza ita-nia eskavatór ba normaliza irrigasaun tanba ita iha ekipamentu (eskavatór). Bá-oin ita sei tau importánsia hodi normaliza irrigasaun ne’e atu agrikultór sira bele halo natar,” nia hateten.
Jornalista: Vitorino Lopes da Costa
Editór: Xisto Freitas da Piedade
