KOVALIMA,17 Jullu 2025 (TATOLI)- Autoridade Munisípiu Kovalima ne’ebé reprezenta husi Sekretáriu Munisipal Asuntu Sosiál no Organizasaun, Filomeno Cardoso, kinta-ne’e, entrega ona xave konstruisaun merkadu iha suku Beco, postu administrativu Suai, Munisípiu Kovalima.
“Ohin, ita mai iha-ne’e hala’o atividade entrega xave merkadu ne’ebé ho kuarta 20. Husi númeru ne’e sala 20 atu faan nesesidade bázika no sala 20 atu faan roupa ba negosiante ida-idak ne’ebé hetan ona xave”, Reprezentante PAM Kovalima, Filomeno Cardoso, informa ba jornalista sira, iha merkadu Beco ohin.
Tuir loloos merkadu ne’ebé entrega ba negosiánte sira, konstrui iha merkadu tuan Derek Camnasa, tanba merkadu referidu prepara ba merkadu rejionál, nune’e autoridade muda merkadu munisipál konstrui iha suku Beco, postu Suai.
“Ita hatene merkadu estadu mak prepara ne’e hanesan patrimóniu estadu, maibé negosiánte sira mak sai nain, nune’e presiza uza ho kuidadu tanba estadu kria de’it kondisaun negosiánte sira mak hetan lukru ba pesoál, nune’e presiza uza ho responsabilidade”. nia fó hanoin.
Atividade entrega xave ne’e partisipa husi Autoridade munisípiu Kovalima, komandante PNTL munisípiu Kovalima, Servisu Munisipál Planu Integradu Dezenvolvimentu (SMPID) , Servisu Munisipál Jestaun no Merkadu no Terra no Propriedade hamutuk hodi entrega konstruisaun merkadu ho medida 14×50 ba negosiánte iha suku Beco.
Vendedór, Rui Cardoso Perreira, hato’o agradese ba Governu ne’ebé konstrui ona merkadu ho kuartu 20 hodi fasilita negosiánte sira faan sasan iha markadu ne’ebé mak ho kondisaun dignu .
“Governu nia esforsu ajuda ami tuir lo los merkadu ida-ne’e konstrui iha Suku Camansa, razaun atu konstrui merkadu rejionál nune’e autoridade foti desizaun konstrui merkadu iha suku Beco “nia dehan.
Fó hanoin fali katak, Autoridade munisípiu Kovalima konstrui merkadu ne’e, liuhusi projetu Servisu Munisipál Planu Integradu Dezenvolvimentu (SMPID) iha 2024 ho nia orsamentu hamutuk $ 137.278.18.
Jornalista:Celestina Teles
Editór: Florencio Miranda Ximenes
