Hamenus mánutrisaun, MS rekomenda tipu ai-han nutritivu karbohidratu-proteina-vitamina
DILI, 17 Jullu 2025 (TATOLI)—Diretora Nasionál Nutrisaun iha Ministériu Saúde, Rosy da Silva, afirma katak atu prevene mánutrisaun iha Timor-Leste, labarik sira ho idade tinan lima (5) ba kraik presiza konsume tipu tolu ne’ebé ekilibradu hanesan aihan nutritivu karboidratu, proteina no vitamina.
Notísia Relevante: PR Horta: “Ita tenke ativu luta halakon mukit no mánutrisaun’’
“Tenke reforsa asisténsia nutrisaun ba grupu prioridade sira hanesan inan isin-rua, inan ne’ebé fó susu ba kosok-oan no labarik ho idade tinan lima mai kraik. Tanba ne’e, grupu sira-ne’e presiza mantein nutrisaun ne’ebé di’ak ba dezenvolvimentu labarik nian. Ita mós presiza tau atensaun ba moras la hada’et oioin ne’ebé kauza husi hipertensaun, diabetes, kolesteról no fatór sira seluk ne’ebé bele kontribui ba moras, nune’e tenke konsume ai-han ne’ebé nutritivu,” Rosy da Silva hateten ba Agência TATOLI, iha nia kna’ar fatin, Lahane, ohin.
Nia hatutan, iha tipu ai-han tolu ne’ebé bele fó atu prevene stunting mak ai-han ne’ebé fó enerjia, promove kresimentu no proteje hasoru moras hanesan karboidratu, proteina no vitamina.
“Ita hakarak ita-nia populasaun atu konsume tipu aihan tolu ne’e ho balansu,” nia afirma.
Nia esplika, tenke fó mós hahan ba labarik sira tuir porsaun ne’ebé tama ba labarik no fornese aihan ne’ebé nutritivu, hanesan sasoro akompaña ho modo no na’an, manu-tolun, ka aihan seluk tan.
Diretór ne’e subliña katak mánutrisaun la’ós kestaun saúde de’it naibé fatór balun seluk kontribui ba stunting, nune’e presiza apoiu husi Ministériu Agrikultura, Ministériu Asuntu Sosiál, no seluk tan.
“Durante inan isin-rua sira mós tenke hetan nutrisaun ne’ebé di’ak. Fulan tolu dahuluk husi isin-rua hanesan tempu ne’ebé mak bebé nia kakutak dezenvolve. Tanba ne’e, durante períodu ne’e, ita tenke garante katak inan isin-rua sira simu aihan nutritivu tipu tolu ne’e ho maneira ida-ne’ebé ekilibradu no ótimu, hodi nune’e bebé nia dezenvolvimentu sai ótimu to’o moris,” nia dehan.
Ministériu Saúde mós husu ba inan-aman sira hotu atu lori oan ho idade tinan 0 to’o tinan 5 hodi bele tetu todan iha sentru saúde ne’ebé besik, atu nune’e bele hetan akompañamentu kontinua husi diresaun saúde nutrisaun.
Mánutrisaun dehan katak fahe ba tipu sira hanesan todan menus, bokur no obesidade no stunting reprezenta 47% husi populasaun iha Timor-Leste.
Jornalista : Felicidade Ximenes
Editór : Cancio Ximenes
