DILI, 17 Jullu 2025 (TATOLI)—Ministru Transporte no Komunikasaun, Miguel Gonçalves Manetelu, hateten nia parte atualiza ba Primeiru-Ministru Interinu, Mariano Assanami Sabino, katak prosesu diskusaun ne’e hala’o reuniaun téknika ida ho Indonézia hodi realiza sertifikasaun ba aeroportu Rota do Sándalo iha RAEOA.
Notísia Relevante: Aeroportu Rota do Sândalo seidauk bele sertifika tanba presiza manutensaun
Governante ne’e afirma, tanba aviaun semo sa’e bosok tama tiha ona espasu aero Indonézia nian, ho ida-ne’e mak presiza iha akordu ho Indonézia no halo sertifikasaun ne’e sai pakote ida para aviaun tuun-sa’e bele liuhusi espasu aero Indonézian nian.
“Entaun, diskusaun ne’e la’o, iha mudansa governasaun Indonézia nian. Antes ne’e ekipa ida husi Indonézia mai hamutuk ho Autoridade Aviasaun Sivíl Timor-Leste (AACTL) no Autoridade Nasionál Aviasaun Timor-Leste (ANA-TL) ba Oekusi hodi haree direta aeroportu ne’e. No ohin ha’u mós atualiza ba Primeiru-Ministru Interinu, Mariano Assanami Sabino, katak prosesu diskusaun ne’e hala’o reuniaun téknika ida ho Indonézia hodi realiza sertifikasaun ba aeroportu,” Ministru ne’e informa ba jornalista sira iha Palásiu Governu, kuarta (16 Jullu 2025) ne’e.
Nia informa, tuir kalendáriu sei halo sertifikasaun aeroportu iha loron 30 fulan Agostu, no bainhira sertifika ona Organizasaun Internasionál Aviasaun Sivíl (ICAO) sei tau iha ninia website, nune’e ajénsia aviasaun sira iha mundu bele haree ona katak aeroportu internasionál iha Timor la’ós de’it ona iha aeroportu Nikolau Lobato Komoro, maibé iha tan ona ida-ne’ebé ho naran Rota de Sándalo Oekusi.
“Entaun bainhira aviaun atu tun ka la tuun iha aeroportu Oekusi depende ba ajénsia sira-nia rasik, maibé ita iha dever liuhusi Autoridade Aviasaun Sivíl Timor-Leste (AACTL) sertifika para públika iha website ICAO nian,” nia hateten.
Nia hateten, tinan-2024 ne’e Ministru Manetelu ba Oekusi hodi konvoka reuniaun ida ho autoridade Rejiaun Administrativa Espesiál Oé-Cusse Ambeno (RAEOA) atu servisu hamutuk hodi sertifika aeroportu Rota do Sándalo sai aeroportu internasionál.
“Maske ninia pista ne’e naruk, no ema balun dehan aeroportu ne’e estandar internasional maibé ne’e la’ós aeroportu internasionál to’o agora tanba seidauk hetan sertifikasaun husi ACTL. Bainhira temi ona aeroportu internasionál signifika aviaun sira husi nasaun li’ur tuun iha ne’ebá,” nia hateten.
Notísia Relevante: Autoridade aeroportu Rota do Sândalo no Indonézia koordena Serbisu Tráfiku Aéreu
Jornalista : Alexandra da Costa
Editór : Cancio Ximenes
