VIKEKE, 17 Jullu 2025 (TATOLI)—Ministru Agrikultura, Peska, Pekuária no Floresta (MAPPF), Marcos da Cruz husu komunidade iha Munisípiu Vikeke koopera ho ekipa veterinária sira atu vasina asu hodi prevene vírus raiva (rabies).
“Agora daudaun programa vasina la’o iha Timor laran, tanba iha fronteira ne’ebá ita deteta ema balun mate ona tanba vírus rabies. Tan ne’e, ha’u husu ba komunidade kuandu ita-nia veterinária sira mai vasina imi-nia asu tenke fó hodi vasina,” nia dehan iha Vikeke, Kinta ne’e.
Governante ne’e dehan ai-moruk antirábika barak hela tanba antes ne’e hetan apoia husi nasaun Austrália liu doze rihun 200.
Aleinde ne’e, Marcos dehan MAPPF mós iha programa vasina ba animál sira hanesan manu, karau no bibi, maibé dalabarak komunidade la koopera.
“Dalabarak ita-nia pesoál sira atu bá fó vasina, ita-nia komunidade la koopera, animál husik de’it, oinsá mak ita-nia pesoál sira fó vasina. Tan ne’e, husu autoridade lokál sira koopera ho ami, hodi hateten ba populasaun sira kesi animál sira, labele husik livre,” nia hato’o.
Jornalista: Vitorino Lopez da Costa
Editór: Xisto Freitas da Piedade
