VIKEKE, 17 Jullu 2025 (TATOLI)—Komandu Polísia Nasionál Timor-Leste (PNTL) Munisípiu Vikeke kaptura joven na’in-haat ne’ebé suspeitadu na’ok sasán ofisina (bengkel) nian iha área Buanurak, Suku Uabubu, Postu Administrativu Ossú, Munisípiu Vikeke.
Suspeitu na’in-haat ne’ebé PNTL detein ho inisiál CP idade 17, RG idade 17, AAG idade 18 no RYS idade 19 ne’ebé PNTL halo identifikasaun ba suspeitu.
“Akontesimentu ne’e akontese iha loron 12 Jullu 2025 maizumenus tuku 03:00 madrugada. Depois ida-ne’e, dadeersan tuku 09:30 Otl, lezadu Domingos N. Fernandes mai hato’o keixa iha Komandu PNTL liuhusi unidade investigasaun. Nune’e, ami-nia membru PNTL buka autór sira no ami konsege identifika suspeitu na’in-haat ne’ebé ami halo ona identifikasaun,” Komandante PNTL Munisípiu Vikeke, Superintendente Polísia António Rego Fernandes ba jornalista sira, iha ninia knaar fatin, Kinta ne’e.
Lider másimu PNTL Munisípiu Vikeke ne’e aprofunda katak sasán ne’ebé rejistadu lakon mak haesan xave-L, vela, kampas cakram, lampu boot motór Beat nian, espellu, rolamentu, xave-T, óliu, screekring, teste mina, tali koreia, peking motorizada boot, teste anin, xave kopu, roda motorizada, kampas ganda no sira seluk tan.
“Dadus ami rekolla ona. Tuir orientasaun husi Ministériu Públiku (MP), ohin ne’e ami aprezenta ba MP hodi halo validasaun, atu prosesu kazu ne’e bá-oin,” António hato’o.
Nia esplika katak kuantidade sasán sira-ne’ebé lakon ne’e soma ba osan purvolta $4.000,00. Tuir lei, kuandu osan liu $1.000 ba leten ne’e, konsideradu furtu agravadu.
Jornalista: Vitorino Lopez da Costa
Editór: Xisto Freitas da Piedade
