KOVALIMA, 17 Jullu 2025 (TATOLI)- Tribunál Judisiál Primeira Instánsia Kovalima kinta ne’e aplika medida koasaun prizaun preventiva ba Arguidu ho inisiál ADS ba kazu omesídiu simples hodi halakon vítima Deonisio Ramos Maia da Silva nia vida, iha aldeia Nunupa, Suku Maliubo, postu Bobonaru.
Kazu omesídiu ne’e akontese iha loron 15 Jullu 2025 no iha loron 17 Jullu , Arguidu ho inisiàl ADS akompaña husi PNTL liuhUsi seksaun investigasaun Munisípiu Bobonaru tuir julgamentu primeiru interrogatóriu iha Tribunàl Judisiál Primeira Instánsia Kovalima.
“Bazeia ba despaixu aplika medida koasaun prizaun preventiva tuir relatóriu arguidu kondisaun moras bele halo tratamentu iha Dili, hodi kontinua halo investigasaun”, Defensór Públiku, Jonas Hendrique Costa informa ba jornalista sira hafoin finaliza julgamentu iha Tribunàl Kovalima, ohin.
TJPI aplika medida koasaun prizaun preventiva ba arguidu komete krime omesídiu simples ne’ebé prevista iha kódigu penál 138 no moldura penál sei hetan pena prizaun tinan 8 to’o tinan 20.
Posesu julgamentu Primeiru Interrogatóriu ne’e prezide husi Juís Samuel da Costa Pacheco, reprezenta Ministériu Públiku, Rafael Gusmão, arguidu hetan asiténsia legál husi Defensór públiku Jonas Hendrique da Costa.
Jornalista :Celestina Teles
Editór :Florencio Miranda Ximenes
