DILI, 17 Jullu 2025 (TATOLI)–Jogadór Zion Pinio Daniel Bassie Cruz husi Portugál prontu reforsa ekipa futeból Selesaun Nasionál Timor-Leste.
Inisiativa ne’e Zion hatudu bainhira akompaña husi aman aprezenta aan iha edifísiu Federasaun Futeból Timor-Leste (FFTL) ne’ebé simu direta husi Sekretáriu Jerál, José Adilson Ribeiro akompañadu husi Ofisiál Serbisu Selesaun Nasionál, José Fonseca iha Tersa (15/07).
“Zion sente kontente no agradese tebes ba FFTL tanba bele konsidera ona ninia inisiativa ne’ebé hakarak reforsa ekipa Selesaun Nasionál Timor-Leste,” sita nota imprensa FFTL ne’ebé TATOLI asesu, Kinta ne’e.
Zion nu’udár raan husi Fernando César Tinoco Cruz (timoroan) no Debby Marlyn Bessie Cruz husi Austrália ne’ebé moris no hela iha Portugál.
Entretantu, Zion Plinio Daniel Bessie Cruz ho idade 24. Daudaun ne’e joga iha Liga Nasionál Portugál (Divizaun 4), husi klube Moura Atlético.
Jornalista: Natalino Belo
Editór: Xisto Freitas da Piedade
