AAM Baukau kontinua regulariza negosiante iha Merkadu Tuanau
DILI, 18 Jullu 2025 (TATOLI)–Autoridade Administrasaun Munisipál (AAM) Baukau kontinua regulariza negosiante sira-ne’ebé hala’o atividade negósiu iha merkadu Tuanau.
Sekretáriu Munisipál Asuntu Planeamentu Investimentu, Eduardo Filipe Ximenes esplika autoridade la taka dalan ba komunidade husi munisípiu ne’ebé de’it atu halo atividade ekonomia iha arredór merkadu Tuanau maibé presiza kumpri regra ne’ebé estabelese bazeia ba kategoria tuir tipu negósiu.
“Ita seidauk duni fila ema ruma iha Baukau. Atu halo negósiu iha merkadu Tuanau Baukau ne’e livremente bele mai. Laiha problema. Maibé, atu permanente sira tenke kumpri regra hanesan rejistu liuhosi jestaun merkadu,” Sekretáriu Munisipál Asuntu Planeamentu Investimentu no Dezenvolvimentu informa ba TATOLI liuhosi telefónema, Sesta ne’e.
Eduardo rejeita informasaun ne’ebé lansada iha públiku relasiona bandu negosiante husi munisípiu seluk atu halo atividade negósiu iha merkadu Tuanau, maibé tenke kumpri ba espasu no kondisaun iha merkadu referidu.
Eduardo relata merkadu Tuanau ne’ebé foin funsiona, aleinde husi Baukau-oan, akumula mós negosiante husi munisípiu seluk ne’ebé harii kioske permanente, maibé AAM Baukau iha intensaun futuru bainhira negosiante sira halo atividade ekonomia presiza kumpri ba regulamentu ne’ebé estabelese nune’e merkadu referidu organizadu tuir kategoria no tipu negósiu.
“Negosiante ambulante ne’ebé husi munisípiu seluk ne’ebé konstrui kioske iha arredór merkadu tenke halo koordenasaun ho Asosiasaun Vendedór no rejistu iha Jestaun Merkadu nune’e atribui espasu ba sira,” Eduardo Ximenes akresenta.
Regra jerál ne’ebé AAM liuhosi Diresaun Jestaun Merkadu fó-sai katak negosiante fahe ba kategoria rua kompostu husi permanente ne’ebé bainhira konstrui kioske presiza bazeia ba medida ne’ebé iha hanesan eskala negósiu ki’ik metru 2×2 no natoon metru 4×5.
Tipu seluk mak negosiante ambulante ne’ebé iha espasu atu harii baraka provizória no bele sobu bainhira atividade fa’an hotu nune’e merkadu Tuanau kontinua iha espasu ba kompradór sira.
Tuir planu, espasu iha merkadu Tuanau, AAM prepara ba planu Governu liuhosi Ministériu Komérsiu no Indústria (MTK) atu implementa projetu moderniza merkadu ne’ebé iha ona faze aprovizionamentu.
Tuir dadus, negosiante permanente iha merkadu Tuanau hamutuk 898 ne’ebé fahe ba kategoria tolu kompostu husi nesesidade bázika, ekipamentu no restorante inklui na-an, ne’ebé totál tipu negúsiu hamutuk 12.
Jornalista: Natalino Belo
Editór: Xisto Freitas da Piedade
