DILI, 18 Jullu 2025 (TATOLI)—Institutu Nasionál Farmásia Produtu Médiku (INFPM) apoiu medikamentuno konsumaveis hamutuk item 42 ba jogu desportiva CPLP, ne’ebé sei halo abertura iha sábadu (19 Jullu 2025) ne’e.
“Komisaun husu mai ami ho item 42 liuliu medikamentu no konsumaveis sira atu apoiu ba atividade desportiva ne’ebé hala’o iha ita-nia rain. Entaun, ami apoiu ona item 30, seluk ne’e ami nafatin distribui,” Diretór Departamentu Kualidade iha INFPM, Miguel Soares, hateten ba Agência Tatoli iha nia kna’ar fatin, Kampung Alor, ohin.
Nia dehan, estoke ai-moruk ne’ebe mak barak liu hodi atende ba atleta sira iha jogu CPLP ne’e mak medikamentu ba primeru sukoru nian.
“Estoke ai-moruk sira-ne’e responsabiliza mak husi profisionál saúde sira korresponde ba primeru sukoru sira mak hanesan fó kurativa ba atleta sira hetan kanek ruma iha atividade jogu desportivu CPLP ne’e,” nia relata.
Nia haktuir, husi ai-moruk item 42 ne’e mak iha terrenu hotu mak INFPM kontinua responde nafatin nune’e profisionál saude sira bele fó atendementu di’ak ba atleta sira.
Jornalista : Felicidade Ximenes
Editór : Cancio Ximenes
