DILI, 18 Jullu 2025 (TATOLI)-Prevedór Direitu Ema-nia no Justisa (PDHJ, sigla portugés), Virgilio Guterres, husu ba Ministra Saúde, Elia dos Reis Amaral, kumpri desizaun Tribunál Rekursu tanba konsidera sirkulár ne’ebé nia halo ba pesoál saúde sira viola konstituisaun Timor-nian.
“Ha’u hanoin desizaun tribunál ninian ne’e la’ós kompeténsia Provedór atu pronúnsia buat ruma. Maibé ha’u hanoin buat ne’ebé hanesan Prevedór bele halo ne’e ho prinsípiu boa-Governasaun, ida mak korajen ukun na’in ninian atu hakruk ba lei”, Virgilio dehan ba jornalista sira iha nia servisu fatin Kaikoli, sesta-ne’e.
Nia hatutan: “Desizaun Tribunál nian ne’e desizaun aas liu, entaun ita tenke kumpri, loloos governante sira tenke halo tuir”.
Rekorda fali katak iha sesta loron 11 fulan-Jullu, Tribunál Rekursu notifika PDHJ hodi fó hateten katak Tribunál Rekursu hafoin haree no halo apresiasaun ba sirkulár ne’ebé Ministra Saúde, Elia dos Reis Amaral, publika hodi bandu pesoál saúde prátika iha klínika privada no hanorin universidade sira ne’e inkonstitusionál, tanba atividade pesoál saúde sira-nia lahó oras servisu la kontra norma jurídika rejime espesiál profisionál nian.
Notísia relevante: MS sei mantein karta sirkulár bandu médiku hala’o prátika iha klinika privadu
Jornalista : Natalino Costa
Editora : Rita Almeida
