DILI, 18 Jullu 2025 (TATOLI)-Komandante Komandu Operasaun Nasionál Polísia Nasionál Timor-Leste (PNTL), Superintendente Xefe Polísia Justinho Menezes, hateten Komandu PNTL deside sei blokeia dalan ba fatin sira ne’ebé sei realiza jogu desportivu CPLP.
Dalan sira ne’ebé Komandu sei blokeia mak estádiu nia oin, tanba abertura ofisiál ba jogu desportivu nian sei halo iha fatin ne’ebá, polísia blokeia dalan husi parlamentu bá Jináziu Dili, tanba modalidade basketbal no karate-do sei realiza iha ne’ebá, ho nune’e polísia sei blokeia dalan diresaun ba kampus sentrál UNTL nian tanba konsidera katak modalidade tenis kampu mós halo iha ne’ebá, polisia mós sei blokeia diresaun ba Lecidere. Polísia sei blokeia dalan sira, hodi fó biban ba jogadór sira bele halo atividade ho di’ak no adeptu sira mos bele asiste ho di’ak.
“Komandu hakarak apela tán dala ida, bainhira abertura hahú, dalan sira ne’ebé sei halo jogu desportivu CPLP nian ne’e ita sei blokeia hotu durante oras atividade ne’e la’o, kuandu atividade ramata sei loke fali”, Justinho Menezes hateten ba jornalista sira iha nia kna’ar fatin Komandu Jerál PNTL Kaikoli, sesta-ne’e.
Nia dehan, ezemplu jogu hahú tuku 15.00 entaun tuku 14.00 taka ona, maibé mós ita haree situasaun bainhira iha movimentu ema mai ladún barak ita bele fó espasu sira bele liu konfirma membru sira ne’ebé iha terenu.
“Futeból ne’e mak abertura iha estádiu munisipál Dili, atletismu mós fatin mak estádiu Munisipál Dili, voliból-praia ne’e iha tasi ibun, kampu Viera de mar Lecidere, basketbal sei halo iha Jináziu Dili no tenis kampu halo iha kampu UNTL nian. Entaun tuir oráriu ne’ebé mak iha karik akontese jogu iha oras hanesan, dalan ne’ebé mak besik fatin eventu ita sei blokeia depoizde jogu remata loke fali”, nia informa.
Nia husu ba na’in ulun sira, autoridade sira, joven sira, hotu hotu atu kumpre no kontribui.
“Ha’u sente katak buat sira ne’e bele difikulta, minimiza ita-boot sira nia negósiu ita-boot sira atividade ne’ebé importante, maibé tanba eventu ida-ne’e eventu nasionál, ita presiza kontribui para hatudu ba mundu katak Timor-Leste mós iha preparasaun di’ak, kondisaun di’ak, seguransa di’ak, bele organiza eventu hanesan ne’e mós bele”, nia afirma.
Justinho Menezes hateten, bainhira eventu ne’e la’o di’ak, ne’e hothotu nia kontribuisaun hahú husik kiik too boot hahú husi seguransa to’o komunidade baibain.
“Ha’u sente komunidade baibain ne’e komprende liu ita ne’ebé komprende lei, tanba ne’e husu ba nai-ulun sira joven sira, inteletuál sira, lideransa organizasaun sira hotu atu kontribui ba eventu ida-ne’e”, nia enkoraja.
Nia dehan, iha eventu ne’e sei iha engarafamentu maibé ne’e normál, agora eventu ne’e laiha mós engarafamentu iha hela, tanba ita-nia dalan úniku ne’e laiha, dalan alternativu mak ida-ne’e de’it .
“Entaun ita hotu nia komprensaun de’it ne’ebé ha’u fiar katak engarafamentu ne’e bele iha la’ós de’it metin maibé la’o neneik sei to’o. Ne’ebé husu para ita hotu nia komprensaun dalan ita-nia alternativu laiha, ita la hanesan ema nia nasaun seluk iha dalan alternativu ita nia mak iha rai ne’e de’it no kampu ne’e besik iha ne’e kedan, entaun ita tenke taka para fó espasu ba ema hotu para atu haree eventu ne’e”, katak nia.
Nia haktuir, objetivu prinsipál jogu desportivu CPLP mak ida atu divulga realidade Timor-Leste. Realidade mak iha entermus seguransa, ita-nia kultura, ita-nia karakter sira para hatudu ba nasaun CPLP, no mundu, segundu atu promove desportu ne’e nu’udar produtu turístiku, terseira mak atu afirma liután Timor-Leste nian integrasaun iha CPLP tanba hafoin ita ukun-aan ita tama kedan ba CPLP.
Jornalista : Natalino Costa
Editora : Rita Almeida
