AINARO, 17 Jullu 2025 (TATOLI)-Gabinete Sosiedade Sivíl no Asuntu Sosiál, Prezidénsia Repúblika, iha loron 17 fulan-jullu 2025 fó ona apoiu nesesidade bázika ba família uma-kain rua ne’ebé afetadu insendiu ne’ebé akontese iha aldeia Malaria, suku Maulau, postu administrativu Maubise, munisípiu Ainaro.
Asesór Prezidénsia Repúblika, Quintiliano Moniz hateten, Prezidente Repúblika, José Ramos Horta maka fó orientasaun ba ekipa hodi distribui apoiu sosiál, hanesan foos, supermi, mina, roupa, orsamentu $250 ba vitima insendiu uma-kain rua iha aldeia refere.
“Ita haree situasaun insendiu ida ne’e grave tanba sira lakon buat hotu-hotu roupa, sanan no buat sira hotu no grasa de Deus tanba sira ida la kanek no lahetan dezastre ida boot,” nia hateten ba jornalista iha aldeia Malaria, kinta ne’e.
Nia dehan, ba futuru, ekipa hosi Prezidénsia Repúblika sei koordena ho Ministériu Solidaridade Sosiál no Inkluzaun (MSSI) no Sekretáriu Estadu Protesaun Sivíl hodi fó apoiu emerjénsia no harii uma ba komunidade afetadu sira.
Hosi Ekipa Gabinete Sosiedade Sivíl no Asuntu Sosiál, Prezidénsia Repúblika sei relata mós situasaun vitima insendiu nian ba Prezidente Repúblika, José Ramos Horta, tanba daudaun ne’e Xefe estadu hala’o hela viajén bá rai liúr.
“Maibé sei tau orsamentu uituan bele apoiu inan faluk ne’ebé ohin lakon ona nia osan $ 1.500.00 ne’ebé nia hetan hosi halo negósiu aileba maka nia rai no rai to ikus ahi-han motuk hotu,” Asesór Prezidensia Repúblika, Quintiliano Moniz hateten.
Iha fatin hanesan vitima insendiu, Anita Pereira Mendonça, haktuir kazu ne’e akontese iha loron 16 fulan-jullu 2025, tuku 1 liu oras Timor-Leste, bainhira vitima bá kuu hela kafé iha toos maibe, derepente viziñu sira hakilar ahi han uma.
“Ahi han ida ne’e, hau mós la hatene tanba, listrik la-lakan durante fulan-tolu derepente ema vizinu sira hakilar dehan ahi han uma. hau nia osan hamutuk $ 1.500.00 ne’ebé maka hetan hosi faan modo tahan iha merkadu,” nia esplika.
Nia hateten agredese ba ekipa Gabinete Prezidénsia Repúblika ne’ebé fó ona apoiu sosiál ba sira hodi sustenta nesesidade lorloron nian..
Jornalista : Francisco Sony
Editór : Agapito dos Santos
