DILI, 19 Jullu 2025 (TATOLI)–Nasaun tolu la partisipa iha Jogu Desportivu Komunidade País Lian Portugés (CPLP-sigla portugeza) ba dala-XII ne’ebé hala’o iha Timor-Leste durante semana ida resin, 17-27 2025.
“Delegasaun ne’ebé la partisipa iha eventu Jogu Desportivu CPLP XII 2025 kompostu husi Brazíl, Guiné Equatorial no Guiné-Bissau. Guiné-Bissau mak últimu ne’ebé ami simu informasaun sei la partisipa iha jogu ne’e,” Ministru Juventude, Desportu Arte no Kultura, Nelyo Isaac Sarmento informa ba jornalista sira iha lokál traballu, Dili, Sábadu ne’e.
Nia esplika, kona-ba delegasaun Brazíl, iha prosesu rejistrasaun dehan marka prezensa maibé ikus dehan la partisipa sein fó razaun.
Ba delegasaun hosi Guiné Equatorial, Nelyo haktuir, laiha informasaun to’o agora no ba delegasaun hosi Guiné-Bissau horisehik kalan konfirmadu katak la marka prezensa.
“Nune’e, komisaun deside katak irmaun CPLP tolu mak la partisipa iha Jogu CPLP XII iha Timor-Leste,” nia aprofunda.
Iha biban ne’e, eis Sekretáriu Estadu Komunikasaun Sosiál informa katak abertura Jogu CPLP XII adia ba tuku 18h30, iha-ne’ebé loloos realiza iha tuku 16h30.
“Ha’u lori informasaun hakarak tatoli ba públiku relasiona ho ita-nia delegasaun sira. Portugál mak to’o ona iha-ne’e. Delegasaun hosi Áfrika hanesan Angola, Cabo Verde, Moçambique, São Tome e Príncipe to’o iha ohin ho Aero Dili. Aviaun primeiru sei lori delegasaun haat ho atleta sira sei to’o iha tuku 4h00 no aviaun segundu sei to’o ho atleta sira hosi Angola iha tuku 18h00-resin,” nia dehan.
Nelyo dehan atleta ho aviaun segundu sei la akompaña serimónia abertura.
“Ho ida-ne’e hakarak hato’o ba ita-nia komunidade ne’ebé mak hakarak atu partisipa ne’e katak ita-nia fatin la to’o atu ema hotu tama bá laran. Maibé, atu hateten de’it katak ita iha tribun rua, liman-karuk ho loos, sé mak hakarak haree bele aproveita, sé mak lais liu nia mak hetan. Fó-hanoin katak kuandu seguransa no komisaun dehan fatin laiha mak ami sei taka odamatan sira-ne’e. Maibé, iha Centro Convencões de Díli (CCD) iha enkraun boot iha-ne’ebá, ne’ebé ema hotu-hotu sei haree hosi ne’ebá,” eis jornalista ne’e subliña.
Jornalista : Osória Marques
Editora : Julia Chatarina
