DILI, 19 Jullu 2025 (TATOLI)-Adeptus Timoroan sira, inklui ho kondisaun defisiénsia ho entuziasmu hakarak assiste direta eventu jogu desportivu ho modalidade futeból entre Timor-Leste ho Portugál iha kampu estádiu munisipál Dili.
“Maske ho kondisaun defisiénsia, ha’u husi Kaikoli nian ho ha’u-nia kadeira rona mai haree jogu. Ha’u kontente asiste eventu ne’e, tanba foin primeiravez iha ita-nia rain. Ida-ne’e halo ha’u kontente loos”, Mariano Mota, abitante Kaikoli, ba Tatoli iha rotunda Estatua Proklamadór, Francisco Xavier do Amaral, sábadu-ne’e.
Nia dehan, dala-barak Timoroan sira fó suporta ba Portugál, maibé liuhusi eventu ne’e, hakarak ka lakohi tenke fó suporta ba ita-nia ekipa.
“Ha’u ohin mai tuku 17.00, ha’u hakarak haree direta eventu no fó suporta ba ita-nia ekipa, maibé hakarak ka lakohi tenke fila ona, tanba udan”, nia afirma.
Kauza husi udan ho intensidade boot uitoan durante minutu haat nia laran halo komunidade balun obrigadu tenke husik fatin no balun la’o tama buka fatin hodi satán-an husi udan.
Tuir observasaun Tatoli, komunidade barak mak okupa estrada diresaun estatua Proklamadór Francisco Xavier antes udan, tanba hakarak asiste serimónia abertura no fó apoiu ba ekipa rua. Maibé akontese udan, adeptus halai fahe malu.
Jornalista : Natalino Costa
Editora : Rita Almeida
