DILI, 20 Jullu 2025 (TATOLI) – Jogu Desportivu Komunidade País Ko’alia Lian Portugés (CPLP) iha modalidade voleiból praia iha loron dahuluk, ne’ebé realiza iha kampu Lesidere, Mosambike halakon Angola ho de’it set rua.
Jogu ne’ebé hahú husi tuku 09:18, jogadór na’in-rua husi Mosambike, Arnoldo Nhantumbo ho kamizola númeru (1) no Maurício José (2) hasoru nia adversáriu husi angolanu, Ruben Campos ho númeru 2 no Teixeira Vas 1.
Durante jogu la’o, parte rua halo kontra-atake, maibé ikus mai Mosambike hatama uluk pontu ba nia adversáriu. Nune’e Angola mós esforsu maibé Mosambike la fó fatin no kontinua hasa’e nia pontu to’o set dahuluk ramata, Mosambike marka pontu 21 no Angola 09.
Hafoin hakat ba set daruak, ekipa rua kontinua hatán malu ho ramata bola, maibé Mosambike lafó fatin no set daruak termina ho pontu 21 no Angola 04.
Hafoin jogu, kapitaun husi Mosambike, Arnoldo Nhantumbo, hateten sira-nia parte kontente tebes manán iha jogu dahuluk ne’e.
“Ami sente kontente tanba esforsu hotu ne’ebé ami halo iha duni rezultadu no aban ami sei kontinua jogu. Ami iha esperansa hakarak manán iha jogu desportivu ne’e”, Arnoldo Nhantumbo ba TATOLI iha Lesidere, ohin.
Iha sorin seluk, kapitaun jogu husi Angola, Ruben Campos, hateten sira-nia parte sente jogu ne’e di’ak tebes maski lakon, maibé ida-ne’e foin jogu dahuluk no iha esperansa katak aban sei joga no bele manán.
“Ami orgullu tebes tanba jogu ne’e amizade tebes. Ohin hakarak manán, maibé iha jogu, ida manán no lakon”, nia dehan.
Jornalista: Arminda Fonseca
Editora:, Maria Auxiliadora
