Tribunál aplika prizaun preventiva ba arguidu ne’ebé halakon Mário Quintão nia vida

DILI, 20 jullu 2025 (TATOLI)-Tribunál Judisiál Primeira Instánsia Dili liuhusi despaixu juis titulár, José Goncalves, deside aplika medida koasaun prizaun preventiva ba arguidu JB enkuantu ADD, BD no L tribunál aplika medida koasaun aprezentasaun periódika fulan-ida dala-rua ba eskuadra polísia Kristu-Rei.
Durante primeiru interogatóriu ba kazu ne’e, Ministeriu Públiku liuhusi Prokuradór, Pedro Batista, promove arguidu sira ho krime omesidiu agravadu ne’ebé previstu iha artigu 139, ho moldura penál tinan-ualu to’o tinan 25. Maibé hafoin Tribunál rekolla ba produsaun ba prova sira ne’ebé Ministeriu Públiku aprezenta ba Tribunál iha-nia promosaun ba kazu, Tribunál entende katak krime ida tan mak Krime sekuestru ne’ebé previstu no punidu iha artigu 160 husi Kódigu Penál Timor-Leste tanba bainhira arguidu sira halo asaun ba matebian Mário Quintao iha area Kuluhun, arguidu sira kontinua lori vitima arguidu sira-nia uma Bekusi hodi kontinua no ikus mai vitima hakotu iis.
Defeza husi arguidu sira nian, Advogadu Privadu, Agustinho de Jesus, dehan arguidu na’in-haat ne’e, iha arguidu na’in-ida hetan medida prizaun preventiva no na’in-tolu hetan medida aprezentasaun periódika.
“Ministeriu Publiku promove ho krime omesidu depois tribunál rekolla prova no entende iha tan krime sekuestru, maibé ida-ne’e servisu boot ida ba Ministériu Públiku hodi halo investigasaun, tanba ne’e mak tribunál deside aplika medida prizaun preventiva ba arguidu JB no aprezentasaun periódika ba arguidu na’in-tolu”, Agostinho de Jesus, ba jornalista sira iha TJPID Kaikoli, domingu-ne’e.
Nia esplika, tribunál aplika medida koasaun prizaun preventiva ba arguidu JB atu asegura arguidu, hodi hein prosesu. Enkuantu aplikasaun medida koasaun aprezentasaun periódika ba arguidu na’in-tolu ne’e atu aprezenta-an hodi Ministériu Públiku kontinua halo mós prosesu ba sira no arguidu na’in-tolu ne’e aprezenta-an ba eskudra polísia ne’ebé besik fulan-ida dala rua hahú husi loron 1 fulan-Agustu.
Agostinho hateten ba arguidu JB ne’ebé hetan medida prizaun preventiva hanesan defeza la konkorda, tanba ne’e sei halo rekursu.
Defeza ne’e esplika, atu aplika medida koasaun prizaun preventiva no aprezentasaun periódu ba arguidu sira tenke haree prienxe ba elementu subjetivu no objetivu ka la’e, kuandu la prienxe ba elementu labele aplika medida ida-ne’e.
“Defeza haree arguidu sira ne’ebé hetan prizaun preventiva no aprezentasaun períodu ne’e la prienxe ba elementu refere, tanba defeza sei halo rekursu hodi kontesta despaixu tribunál nian ba aplikasaun medida koasaun ba prizaun preventiva ba arguidu JB no arguidu na’in-tolu seluk”, nia konklui.
Rekorda fali katak ba kazu ida-ne’e akontese iha (13/07) foin lalais ne’e bainhira matebian Mário Quintao tula nia namorada ho inisiál L ho motór lori bá área Dolok-Oan (Kristu-Rei). Nune’e to’o iha Dolok-Oan matebian Mario Quintão diskute malu ho nia namorada, tanba de’it vitima telefone nia namorada la foti telefone, nune’e sira na’in-rua istori-malu.
Depois vitima ho nia namorada istori-malu hotu, to’o iha oras lokraik deside fila hosi Dolok-Oan, maibé to’o iha dalan klaran, mai to’o área Lecidere vitima nia namorada ho oin inisiál L haruka mensajen ba nia maun sira no o nia maun sira buka tuir iha Lecidere, depois nia maun sira komesa buka tuir vitima no vitima nia namorada hetan Mário Quintao Kuluhun hodi sira halo asaltu ba matebian balu tuku tebe to’o grave, depois sira lori matebian ba HNGV la konsege salva nia vida no hakotu Mário hakotu iis.
Jornalista : Natalino Costa
Editora : Rita Almeida

