DILI, 21 Jullu 2025 (TATOLI)–Atleta Nasionál Timor-Leste liuhusi modalidade Taekwondo hanesan Deofia Barreto no Nélio dos Santos hakat bá finál hafoin halakon atleta husi Angola no Mosambike iha envetu Jogu Desportu Komunidade Nasaun Lian Portugés (CPLP-sigla portugeza) ba dala-XII 2025, iha Timor-Leste.
Atleta Deofia Barreto hakat bá finál hafoin iha jogu meiu finál halakon atleta husi nasaun Angola, Jasmin Cassia ho kategoria kilógrama 46 no Nélio halakon atleta husi nasaun Mosambike, Lauren iha kategoria kilógrama 55.
“Hakarak hatudu jogu ne’ebé di’ak ba ha’u-nia nasaun Timor-Leste no lori nasaun bá mundu,” Deovia informa ba TATOLI iha Jinázu Dili, Segunda ne’e.
Notísia relevante: Atleta Taekwondo preparada partisipa jogu CPLP
Atleta Deofia iha jogu volta dahuluk durante minutu tolu (3), rekollla pontu 15 no Jasmin rua (2). Jogu kontinua ba volta daruak atleta timoroan Deofia hatudu jogu ne’ebé atrativu hodi rekolla pontu hitu, enkuantu Jasmi rekolla de’it pontu tolu (3), nune’e Deofia iha direitu hakat bá finál ho totál pontu 2-0.
Iha Blbiban ne’e, Atleta Nélio dos Santos elemina Atleta Lauren ho totál ronde tolu hanesan volta dahuluk Nelio rekolla pontu-neen (6) no Lauren Cristiano rekolla de’it pontu tolu (3). Jogu kontinua ba volta daruak Atleta husi Mosambike konsege rekolla pontu sia (9) no Nélio rekolla pontu tolu (3). Nune’e, jogu kontinua ba volta datoluk iha-ne’ebé Nélio rekolla pontu haat (4) no Lauren rua (2), tan ne’e rezultadu ikus Timor-Leste hetan pontu rua (2) no Mosambike rekolla de’it pontu ida (1).
Atleta husi nasaun haat mak kompete iha modalidade Taekwondo kompostu husi Portugál, Angola, Mosambike no Timor-Leste nu’udár uma-na’in iha-ne’ebé kompete iha kategoria haat hanesan kilógrama 46 (feto), 55 (mane), 49 (feto) no 51 (mane).
Jornalista: Natalino Belo
Editór: Xisto Freita da Piedade
