VIKEKE, 21 Jullu 2025 (TATOLI)—Servisu Diresaun Nasionál Transporte Terrestre (DNTT) Munisípiu Vikeke hahú husi fulan-Janeiru to’o fulan-Juñu 2025 rekolla taxa hamutuk $59.188,00 ba kofre Estadu.
Diretór Servisu DNTT Munisípiu Vikeke, Saul Henrique haktuir taxa ne’ebé DNTT Vikeke rekolla maihusi fonte reseita hanesan karreta, motorizada, lisensa traázitu ba transporte públiku, karta kondusaun renova no rejistu foun no mós rejistu karreta no motorizada sira-ne’ebé asesu ba kréditu.
“Kona-ba taxa ne’ebé ami rekolla husi fulan-Janeiru to’o fulan-Juñu ne’e ami kontribui $59.188,00 ba kofre Estadu. Taxa sira-ne’e ami rekolla mai husi fonte refeita haat ne’ebé sita iha leten,” Saul Henrique ba TATOLI iha ninia kna’ar fatin, Beloi, Vikeke, Segunda ne’e.
Aleinde ne’e, nia relata, dezafiu ne’ebé DNTT Vikeke enfrenta mak hanesan seidauk iha edifísiu própriu, menus koñesimentu ba atendimentu karta lisensa, inspesaun no presiza kapasitasaun ba funsionáriu DNTT hodi fó atendimentu.
“Ita hakarak atendimentu di’ak presiza iha edifísiu hodi fó atenidimentu ba ita-nia kliente sira. Problema seluk mak ami menus koñesimentu ba inspesaun, lisensa, tráfíku ba karreta no motorizada. Preokupasaun sira-ne’e ami hato’o ona ba diresaun hodi haree tanba liga mós ba orsamentu,” Saul subliña.
Tuir dadus, taxa kada fulan hahú husi fulan-Janeiru $12.031,50, Fevereiru $11.543,00, Marsu $10.187,50, nune’e ba trimestre dahuluk rekolla taxa totál $33.762,00. Iha trimestre daruak hahú husi fulan-Abríl $9.767.00, Maiu $7.421,50 no Juñu $8.237.50, nune’e taxa ba trimestre daruak nian ho totál hamutuk $25.426,00.
Enkuantu, funsionáriu DNTT Munisípiu Vikeke daudaun ne’e totál hamutuk na’in-10 ne’ebé ativu fó atendimentu ba kliente sira.
Jornalista: Vitorino Lopes da Costa
Editór: Xisto Freitas da Piedade
