DILI, 21 Jullu 2025 (TATOLI)-Prezidente Federasaun Basketeból Timor-Leste, Joaquim Gusmão, hateten ekipa selesaun U-16 preparadu hasoru ekipa basketeból Angola iha jogu desportivu CPLP, aban.
“Primeiru ita tenke komprende katak jogu CPLP ne’e jogu amigavel, jogu ida ne’ebé mak ita dehan 16 anus mai kraik nian. Aban ita jogu abertura basketeból ne’e ita hasoru Angola ba primeiru jogu feto no mane, bele dehan ita-nia ekipa basketeból preparadu ba jogu desportivu CPLP iha Jináziu Dili”, Joaquim Gusmão ba Tatoli bainhira observa preparasaun ekipa nasionál basketeból ba jogu desportivu CPLP ne’ebé halo iha Jináziu Dili, segunda-ne’e.
Nia dehan, abertura jogu desportivu CPLP ba modalidade basketeból sei hahú tuku 15:00, abertura husi Ministru Juventude Desportu Arte no Kultura (MJDK), Nelyo Isaac Sarmento.
“Tuir loloos oráriu ba abertura hahú loraik ekipa mane no feto hasoru ekipa Angola iha tuku 16:00, maibé ita sei iha serimónia ba abertura, ne’ebé ita halo sedu tuku 15:00”, nia informa.
Nia esplika ekipa selesaun ba modalidade basketeból mai husi eskola sira iha Dili laran.
“Tuir loloos selesaun ne’e ita atu halo iha munisípiu maibé haree ba tempu jogu desportivu CPLP tempu badak demais, nune’e ita deside halo de’it selesaun ba eskola iha Dili laran”, nia afirma.
Joaquim Gusmão hateten, federasaun halo selesaun ba jogadór sira husi hahú fulan-Maiu no sira hela asrama hodi prepara ba jogu desportivu CPLP nian.
Nia esplika, federasaun selesiona mane-ualu no feto-ualu no ikus na’in ualu mak selesiona, mane-haat, feto-haat.
“Ha’u sente ita hanesan donudekaza, ita bem preparadu ba jogu desportivu CPLP”, nia haktuir.
Joaquim dehan, horisehik, ohin no to’o aban dadeer ekipa kontinua treinu no aban lorokraik mak foin jogu. “Iha jogu ne’e ita-nia ekipa mane ema na’in-haat no ekipa feto mos hanesan, na’in-ida nu’udar suplente. Jogu ne’e ema na’in-tolu mak sei hasoru malu”, nia haktuir.
Nia dehan, jogu ida-ne’e oinsá mak ita bele promove ita-nia amizade no ita-nia kultura, hametin relasaun nu’udar nasaun membru CPLP.
Jornalista : Natalino Costa
Editora : Rita Almeida
