DILI, 21 Jullu 2025 (TATOLI) – Tribunál Supremu Justisa nian mak órgaun boot liu iha órgaun ierárkia tribunál judisiál hotu-hotu ninian, tanba ne’e tempu ona atu estabelese hodi fó justisa ida kualidade ba povu.
Jurista timoroan, Sérgio Quintas, dehan durante tinan 20-resin, Tribunál Rekursu mak halo papél Tribunál Supremu Justisa nian. Nune’e, nia apoia planu husi Prezidente Tribunál Rekursu foun, Afonso Carmona, ne’ebé sei fó atensaun atu harii iha nia mandatu.
Tuir nia, bainhira harii Tribunál Supremu ida-ne’e mak pozitivu maka kompleta ona ierarkia tribunál nian.
“Ida-ne’e bele fó justisa ida ne’ebé ho kualidade ba povu. Tanba Tribunál Supremu Justisa mak sei avalia desizaun husi tribunál primeira no segunda instánsia”, hateten.
Supremu Tribunál sai fatin úniku atu foti desizaun instánsia ikus. “Ita-nia espetativa, ezije ema ne’ebé atu tuur iha Supremu Tribunál Justisa ne’e, iha kapasidade no kualifikadu iha direitu penál no sivíl”, nia sujere.
Aleinde liuhusi avaliasaun rigoroza ba juís primeira klase, iha reputasaun di’ak, inklui parte Ministériu Públiku presiza iha koñesimentu di’ak hodi elabora sentensa.
“Iha Tribunál Supremu sira-nia desizaun sai mai ne’e, haree liubá matéria direitu no referénsia”, nia hateten.
Tuir Konstituisaun artigu 125, hola parte iha Tribunál Supremu Justisa nian, juís karreira nian, Majistradu Ministériu Públiku nian no jurista sira-ne’ebé iha naran boot, iha númeru ne’ebé lei mak sei determina, nune’e ida, Parlamentu Nasionál mak hili, sira seluk Konsellu Superiór Majistratura Judisiál nian mak hili.
Tanba ne’e, nia sujere iha futuru atu nomeia ema tenke kualidade no indenpedente. “Ne’e norma konstituisionál. Ita hakarak ema sira ne’ebé atu nomeia, juís konselleiru ne’ebé atu tuur iha ne’ebá konxiente, tanba kapasidade no reputasaun mak tuur iha ne’ebá, maibé la’ós tanba interese”, nia hato’o.
Rekorde katak, iha reuniaun plenária Parlamentu Nasionál, deputadu sira husu Governu prepara rekursu, promosaun karreira juís, infraestrutura no kestaun seluk hodi bele harii ona Tribunál Supremu Justisa iha país.
Notísia relevante: https://tatoli.tl/2025/05/06/deputadu-cnrt-husu-ptr-tau-atensaun-ba-promosaun-majistradu/
Jornalista: Nelson de Sousa
Editora: Maria Auxiliadora
