MSSI apoiu foos ba vulneravel hamutuk uma-kain 53 iha Builó
VIKEKE, 21 Jullu 2025 (TATOLI)—Servisu Ministériu Solidaridade Sosiál no Inkluzaun (MSSI) Munisípiu Vikeke, segunda ne’e, apoia nesesidade bázika (foos) ba vulneravel sira hamutuk uma-kain 53 husi Suku Builó, Postu Administrativu Ossú, Munisípiu Vikeke.
Diretór Servisu MSSI Munisípiu Vikeke, Geraldo de Carvalho informa servisu MSSI Munisípiu Vikeke apoia ai-han nesidade bázika ba família vulneravel sira husi Suku Builó tanba menus ai-han.
“Ohin ami fó apoiu foos ba família vulneravel, ema ho difisiénsia no idozu avandonadu ne’ebé menus ai-han hamutuk uma-kain lima 53 iha suku Builó. Apoia ida-ne’e ita-nia xefe Suku Builó mak hato’o pedidu ba ami. Tan ne’e, ami responde sira-nia pedidu,” Geraldo de Carvalho ba TATOLI iha Postu Vikeke Vila.
Geraldo subliña apoia foos ne’e autoridade sira foti direta iha Sentru Solidaridade Sosiál Raitahu hodi lori bá Builó mak distribui ba benefisiáriu sira bazeia ba pedidu ne’ebé hato’o husi autoridade.
“Apoia foos ne’e kada uma-kain hetan kilógrama 25,” nia hato’o.
Nia haktuir katak foin lalais MSSI nasionál distribui foos hamutuk saku 1.000 ba koléjiu orfonatu, família vulneravel no eroi vivu sira.
“Atu hetan apoiu foos husi ami, tenke hato’o pedidu, depois ami-nia tékniku ofisiál sira bá halo verifikasaun, mak família sira menus duni ai-han, sei distribui apoiu foos,” Geraldo esplika.
Entretantu, família vulneravel uma-kain 53 ne’ebé simu foos husi aldeia haat hanesan aldeia Buareka, Builó, Derlo no Lutugia.
Jornalista: Vitorino Lopez da Costa
Editór: Xisto Freitas da Piedade
