DILI, 21 Jullu 2025 (TATOLI) – Governu Austrália kolabora ho Gabinete Vise Primeiru Ministru no Ministru Koordenadór Asuntu Ekonómiku no Ministru Turizmu no Ambiente, preparadu atu realiza Konferénsia Ekonomia no Negósiu. Data ba realizasaun hahú husi loron 07 to’o 08 Agostu 2025 iha Sentru Konvensaun Dili (CCD, sigla portugés).
Nota imprensa ne’ebé Ajénsia TATOLI asesa segunda ne’e informa, konferénsia ne’e kolaborasaun entre Governu Austrália, Gabinete Vise Primeiru Ministru no Ministru Koordenadór ba Asuntu Ekonómiku no Ministru Turismu no Ambiente, TradeInvest Timor-Leste, no Kámara Komérsiu Indústria Timor-Leste (CCI-TL, sigla portugés).
Líder emprezariál hamutuk 300 husi Austrália no Timor-Leste mak espeta sei tuir konferénsia ne’e, ho kompañia hamutuk 40 mak sei aprezenta sira-nia produtu no servisu iha feira komérsiu.
Objetivu prinsipál husi konferénsia ne’e mak, atu hametin relasaun ekonómiku no negósiu entre Timor-Leste no Austrália, liuhusi halibur líder emprezáriu, investidór, no polítika na’in sira, hodi halo koneksaun, kolaborasaun no eksplora oportunidade iha setór prinsipál haat mak hanesan: agrikultura; turizmu; manufatura no prosesamentu; no minerál no rekursu.
Konferénsia sei hala’o iha sesaun temátiku rua iha kada loron. Iha loron dahuluk, sei foka ba turizmu no agrikultura, no loron daruak sei kobre manufatura no prosesamentu, inklui minerál no rekursu. Loron daruak sei inklui mós painel diskusuan kona-ba Timor-Leste nia adezaun ba ASEAN.
“Ami kontente anunsia mós katak, oradór importante sira sei partisipa mós iha konferénsia ne’e. Oradór sira-ne’ebé konfirma ona mak inklui influensadór prominente sira iha rejiaun, hanesan: Señor Nicholas Moore, Enviadu Espesiál Austrália ba Sudeste Aziátiku no Señór Shane Walden, Embaixadór Negósiu Austrália ba Timor-Leste. Sira-nia hanoin no prezensa sei fó kontribuisaun iha diskusaun kona-ba kooperasaun ekonómiku no dezenvolvimentu sustentável entre Timor-Leste no Austrália, no subliña importánsia konferénsia ne’e nudar plataforma ba diálogu, kolaborasaun, no parsería ba future,” refere nota imprensa ne’e.
Durante konferénsia loron rua, partisipante sira sei esplora oportunidade iha negósiu no parséria, estabelese rede negósiu ho negósiu, no buka atu komprende di’ak liután posibilidade sira ba halo kooperasaun negósiu ne’ebé kle’an liu entre nasaun rua.
Konferénsia ne’e mós iha objetivu atu hetan koñesimentu ne’ebé bele hametin no apoia ajenda ba reforma ekonómika ne’ebé lidera husi setór privadu iha Timor-Leste.
TATOLI
