DILI, 22 Jullu 2025 (TATOLI)-Atleta feto na’in-neen ne’ebé hafoin kompete iha faze eliminasaun ba klase korida 200 metru sei avansa iha faze finál ne’ebé sei realiza iha loron aban (23/07/2025) hodi termina kompetisaun ba modalidade atletismu nian iha jogu desportivu Komunidade Nasaun sira ne’ebé ko’alia lian-portugés (CPLP, sigla portugés).
Faze eliminasaun korida 200 metru iha atleta na’in-11, ne’ebé kompostu husi nasaun Portugál na’in-rua, Kabuverde na’in-rua, Angola na’in-haat, Saun Tomé e Prínsipe na’in-ida, no Timor-Leste na’in-rua.
Tanba ne’e tuir reprezentante atleta Portugál, Maria Seguru Nandim, hateten agradese bele hetan oportunidade hodi hakat ba faze finál, maske ohin nia sente difikuldade uitoan tanba loron-manas maka’as.
“Maibé ha’u sei prepara ha’u nia-an ho másimu liután, nune’e iha kompetisaun ba loron aban nian bele hatudu rezultadu ne’ebé mak di’ak iha korida mistura”, atleta ne’e ba Tatoli iha estádiu munisipál Dili, ohin.
Nia seidauk iha espetativa atu bele sai vensedora ba loron aban, tanba nia haree katak atleta seluk ne’ebé sira kompete hamutuk mós mesak maka’as hotu, entaun aban mak ita haree hamutuk rezultadu, maibé nia sei tenta atu haka’as-an hodi bele kontribui rezultadu di’ak ba nia nasaun Portugál.
Nune’e mós tuir nia belun Leonor Silva de Freitas, nia sei hatudu liután ninia dezempeñu di’ak tanba durante ne’e nia esforsu treinu ho intensivu.
“Espera aban ha’u bele rekolla tan medalla, maske horisehik konkista ona medalla prata ida, maibé sei hakarak atu rekolla barak liután iha korida mistura 4×100 metru”, nia hateten.
Durante kompetisaun kada atleta sira esforsu tebes ho sira-nia tátiku halai nian, maske balun falla iha inisíu maibé sira kontinua esforsu hodi duni malu to’o iha finál (meta).
Notísia relevante: Portugál kontinua lidera iha halai-taru 3000 metru
Jornalista : Alexandra da Costa
Editora : Rita Almeida
