INSPTL-Fundasaun Alola asina akordu tékniku iha kapasitasaun ba pesoal saúde sira
DILI, 22 Jullu (TATOLI)–Institutu Nasionál Saúde Públika Timoor-Leste ho Fundasaun Alola, tersa ne’e, asina akordu kooperasaun tékniku iha área kapasitasaun hodi fo formasaun ba pesoál saúde sira iha munisípiu sia (9) iha Timor-Leste.
“Ami hamutuk ho Fundasaun Alola selebra ami-nia estensaun akordu servisu hamutuk, atu ofisializa servisu ne’ebé INSPTL ho fundasaun Alola ba oin liuliu fó formasaun ba pesoál saúde sira iha munisípiu sia (6) hanesan Dili-Ataúru, Aileu Likisa, Lautein, Vikeke, Ainaru no Manufahi,” Prezidente INSPTL, Merita Monteiro, hateten ba jornalista sira, iha INSPTL, Comoro, ohin.
Nia dehan, ida-ne’e la’ós akordu foun maibé extensaun de’it tanba servisu ne’e antes hala’o ona hamutuk tinan barak ona.
”Durante ne’e, ami haree hamutuk ba iha área kapasitasaun formasaun ba pesoál saúde sira iha ne’ebé mak ami halo formasaun atu hasae sira-nia koñesemementu ba iha área saúde inan no oan no adolosente sira. Maibé, iha tinan ida-ne’e, akordu tékniku ne’ebé ami asina hamutuk ho períodu tinan tolu (3) ba oin, maibé sei aumenta tan pontu seluk ba iha área peskiza nian,” nia haktuir.
Nia relata, rezultadu implementasaun programa sira-ne’ebé mak durante halo ne’e seidauk peskiza no define loolos iha área saida mak hakarak halo.
Maibé, nia dehan, iha ona hanoin balun ne’ebé mak hakarak peskiza atu avalia fila-fali implementasaun sira mak INSPTL halo ona liu-liu ba peskiza implementsaun sira iha impkatu iha ka lae.
Iha fatin hanesan, Diretora Ezekutiva Fundasaun Alola, Maria Imaculada Guterres, dehan asina akordu ho objetivu atu halo kolaborasaun tékniku hamutuk ho INSPTL atu bele apoiu implementasaun programa ne’ebé mak Fundasaun Alola iha liuhusi programa inan no oan.
”Akordu ne’ebé mak ohin asina ne’e atu hreee liu ba nia implementasaun programa ba liu formasaun pesoál saúde sira iha área sira hanesan programa inan no oan, saúde labarik nian liuliu ba nutrisaun, saúde reprodutiva adulisente no mós ba prevensaun moras kankru,” Maria dehan.
Nia afirma, akordu ne’ebé mak asina ne’e dura ba tinan tinan tolu ba oin, atu enkaixa tan departamentu peskiza INSPTL nian, atu apoiu mós programa sira-ne’ebé Fundasaun Alola halao durante implementa liu liu iha relasaun ho peskiza ne’ebé Fundasaun Alola planeia atu ba kankru feto hanesan kankru susun no kankru serviks.
Jornalista : Felicidade Ximenes
Editór : Cancio Ximenes
