Komisáriu PNTL halo diálogu ho komunidade-diskute asuntu seguransa iha Fatumea
KOVALIMA, 22 Jullu 2025 (TATOLI)- Komandante Jerál PNTL, Komisáriu Henrique da Costa partilla informasaun no diskute asuntu seguransa ho autoridade sira iha postu administrativu Fatumea, Munisípiu Kovalima.
Molok atu hala’o atividade sorumutu komunitária ne’e, lia-nain sira simu komandante Jerál PNTL, Komisáriu Henrique da Costa ho lia dadolin tuir kultura suku Belulik Leten, Postu Administrativu Fatumea.
“Ohin, ita hala’o diálogu ho ita nia autoridade iha postu administrativu Fatumea hodi partilla informasaun kona-ba asuntu seguransa nune’e bele servisu hamutuk hodi garante seguransa iha fronteira terrestre”, Komandante Jerál PNTL ne’e relata ba jornalista sira iha Fatumea, ohin.
Komjer halo diálogu ho autoridade hodi partilla informasaun kona-ba asuntu seguransa relasiona númeru PNTL menus. Tanba ne’e autoridade no komunidade sai matan no ibun ba autoridade seguransa bainhira iha informasaun bele pasa ba autoridade seguransa hodi bele responde.
Atividade diálogu ne’e hala’o iha munisípiu hanesan Ainaro, Ermera no dadaun ne’e iha postu Fatumea rona Autoridade iha preokupasaun konaba asuntu seguransa.
“Dala ruma ita halo servisu ita hanoin buat hotu loos, maibé laiha preokupasaun komunidade falta buat balun ita presiza atu rona, nune’e bele garante seguransa ba komunidade ho di’ak liu”, nia informa.
Durante prezensa, Komandante Jerál PNTL iha postu Fatumea hala’o atividade sira hanesan, diálogu ho autoridade postu no komunidade iha Fatumea kuda-ai oan iha resintu eskuadra PNTL no postu administrativu Fatumea, hafoin kontinua hala’o mós vizita postu UPF sira iha postu administrativu Fatumea.
Iha sorin seluk, Administradór Postu Administrativu Fatumea, agradese tanba Komandante Jerál PNTL bele vizita postu Fatumea hodi partilla informasaun kona-ba asuntu seguransa iha fronteira.
“Ami autoridade postu hato’o agradesimentu tanba bele hetan vizita traballu husi Komandante Jerál PNTL hodi deskuti asuntu ho autoridade sira iha postu administrativu”, nia dehan.
Autoridade postu aprezenta pontu importante haat
Entretantu, Administradór Postu Administrativu Fatumea, Sezar Madeira, aprezenta pontu importante haat kona-bá asuntu seguransa ba komandante Jerál PNTL, Komisáriu Jerál Polísia Henrique da Costa.
“Ha’u hato’o rekomendasaun tanba haree ba kondisaun edifísiu grave ona, nune’e la merese ona ba futuru bele konstrui edifisiu ne’ebé kompleta ho kazerna”, Autoridade Postu Fatumea ne’e hato’o ba iha diÁlogu ho autoridade iha fatumea, ohin.
Autoridade postu ne’e informa katak iha fulan-fevereiru ne’e observa ona rai atu konstrui edifisiu ba PNTL kompleta ho kazerna PNTL iha postu antigu lokaliza iha aldeia Klauhalek, Suku Belulik Leten.
Rai ne’ebé autoridade entrega ba komandu PNTL Munisípiu ho nia estatutu la iha disputa tanba rai estadu
Razaun atu aumenta tanba geografikamente postu Administrativu Fatumea, fronteira ho Indonézia ne’ebé fatumea iha nia suku tolu aldeia 12 ho totál populasaun 4712, feto 2.326 mane 2.386 ho totál Xefe família 1,197 ho luan área kilomentru kuadradu 123.
Hataan ba problema ne’e Komandante Jerál PNTL, Komisáriu Jerál Polísia Henrique da Costa dehan simu duni preokupasaun autoridade atu hari’i postu UFP rua hanesan iha área foho raimea ho Laobetun.
“Ita orienta ona ba komandante UPF atu halo movimentu bazeia informasaun fatin ne’ebé ita koloka ema la uza ka mamuk”, nia afirma.
Ho preokupasaun autoridade postu seidauk bele koloka membru tanba seidauk kria kondisaun atu koloka membru sira hodi hala’o servisu atu halo kontrola iha fronteira.
Jornalista : Celestina Teles
Editór: Florencio Miranda Ximenes
