DILI, 22 Jullu 2025 (TATOLI)—Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT) planeia sei troka xapa matríkula foun ba transporte hotu-hotu tuir ida-idak nia kódigu munisípiu nian.
Diretora Jerál Diresaun Nasionál Transporte Terrestre, Maria Antónia Vitor da Costa, hateten loos duni katak DNTT servisu hamutuk ho Ministériu Transporte no Komunikasaun (MTK) tinan oin sei kria xapa matríkula foun tuir kódigu munisípiu ida-idak.
“Ministru Transporte no Komunikasaun fó sai ona katak, tinan oin ita sei muda hotu xapa matríkula sira ne’ebé agora daudaun iha tuir kódigu Munisípiu ida-idak. E,ntaun ami prepara ona diploma sira bainhira hetan aprovasun ita sei implementa,” Diretora Jerál ne’e informa ba Agência Tatoli iha nia kna’ ar fatin DNTT, Balide, ohin.
Nia dehan, tanba ne’e polítika Ministériu nian, fasíl atu bele identifika Transporte tuir munisipál ida-idak, bainhira lei ne’e aprova tiha Diresaun Nasionál Transporte no Terrestre sei hala’o sensibilizasaun ba komunidade hodi bele komprende no intende di’ak.
Antes ne’e mós Ministru Transporte no Komunikasaun, Miguel Manetelu, deklara informasaun liuhusi pájina ofisiál MTK katak nia mós aprova ona diploma ministerial ida kona-ba xapa matrikula.
“Ha’u mós aprova ona diploma ministeriál ida kona-ba xapa. Hahú tinan oin xapa sira-ne’e troka hotu kedas, tanba xapa hahú kode ida kada munisípiu para bele identifika karreta ka motorizada mai husi ne’ebé. Nune’e dezastre ruma iha buat ruma, ita hatene katak karreta ne’e mai husi Bobonaru, Kovalima no seluk tan. Diploma ne’e ha’u asina ona hamutuk ho DNTT, ami hare katak implementasaun ne’e tinan oin,” nia dehan.
Ministru Manetelu husu ba DNTT atu kontinua halo sensibilizasaun ba komunidade kona-ba sonoru sira-ne’ebé mak DNTT monta tiha ona iha kapitál Dili, ho nune’e ema bele komprende no uza ho di’ak.
Se lae, nia dehan, sonoru sira-ne’ebé DNTT monta saugate de’it maibé DNTT tenke halo sensibilizasaun liuhusi televizaun no mídia sosiál sira, ho nune’e motorista sira bele kumprd regra sira-ne’e.
Jornalista : Alexandra da Costa
Editór : Cancio Ximenes
