SERVE Bobonaru halibur reseita $4.864 iha trimestre daruak 2025
BOBONARU, 22 Jullu 2025 (TATOLI)—Servisu Rejistu Verifikasaun Emprezariál, Institutu Públiku (SERVE, I.P.) Delegasaun Territoriál Munisípiu Bobonaru iha trimestre daruak tinan 2025 halibur reseita hamutuk $4.864 hodi kontribui ba kofre Estadu.
Koordenadór SERVE I.P. Munisípiu Bobonaru, Leopoldo Pereira Fernandes informa katak reseita hirak-ne’e halibur liuhusi atividade kliente sira mai halo renovasaun dokumentu sira hanesan sertidaun ba rejistu komersiál, re-imprimi ba sertidaun rejistu komersiál, pedidu rejistrasaun foun no renovasaun ba ezersísiu atividade ekonónika ne’ebe sujeita atu hetan lisensa setoriál.
Aleinde ne’e, rekolla mós husi empreza sira-ne’ebé mai halo alterasaun ba objetu aumenta atividade, alterasaun sede, administradór, órgaun sosiál, kapitál sosiál no seluk tan.
“Reseita Abríl nian $1.587, Maiu $1.366, Juñu $1.911 no totál $4.864,” Koordenadór Leopolodo informa ba TATOLI iha kna’ar fatin, Tersa ne’e.
Totál rejistu komersiál hahú husi Abríl to’o Juñu ne’e hamutuk 62, ne’ebé fahe ba tipu negósiu ka empreza ENIN 51, Unipessoal por Quotas Limitada (Lda) 11.
Enkuantu, iha trimestre dahuluk hahu husi fulan-Janeiru konsege rekolla $780, Fevereiru $2.135,00 no Marsu $2.215,00.
Jornalista: Sergio da Cruz
Editór: Xisto Freitas da Piedade
