VIKEKE, 22 Jullu 2025 (TATOLI)—Sentru Juventude (SJ) Munisípiu Vikeke ne’ebé hetan apoia fundu husi Gabinete Apoia Sosiedade Sivíl (GASS) hodi oferese Formasaun Edukasaun Sívika ba joven sira atu kontribui ba pás.
Iha abertura formasaun ne’e, Sekretáriu Asuntu Sosiál Organizasaun Komunitária Munisípiu Vikeke, Acasio de Sousa hateten formasaun edukasaun sívika ne’e importante ba joven sira, tan ne’e tenke aproveita formasaun sira-ne’e hodi hasa’e koñesimentu liga ba konxiénsia umana nian.
“Ita-nia Sentru Juventude Inisiativa di’ak halo proposta ba GASS hodi hetan realiza formasaun edukasaun sívika ba juventude hodi fanun ita-nia joven sira kria pás no estabilidade. Maski durante ne’e ha’u seidauk rona katak joven sira husi Suku Uma Ki’ik ne’e halo problema, maibé ha’u husu nafatin ba joven sira nafatin asegura pás no estabilidade hodi kontribui ba dezenvolvimentu,” Acasio de Sousa ba TATOLI iha sede Suku Uma Ki’ik, Tersa ne’e.
Autoridade Munisípiu Vikeke ne’e aprofunda katak joven sira tenke simu dezenvolvimentu ne’ebé tama iha Suku Uma Ki’ik. Joven labele halo impedimentu ba dezenvolvimentu tanba projetu ruma tama iha Suku Uma Ki’ik joven sira mak nu’udór autór ida hodi asegura.
Iha fatin hanesan, Diretór Sentru Juventude, Januário Benevides haktuir formasaun edukasaun sívika ne’ebé Sentru Juventude realiza iha Suku Uma ki’ik ho objetivu atu muda joven sira-nia konxiénsia, karater no mentalidade nune’e joven sira bele iha hanoin di’ak.
“Formasaun ida-ne’e oinsá atu muda joven sira-nia karater sira iha sosiedade nia leet, tanba daudaun ne’e ita haree joven sira-nia karater la’ós ona hanesan joven sira uluk. Tan ne’e mak ami husu apoiu fundu ba GASS hodi realisa formasaun ba ita-nia joven sira. Fundu ne’ebé ami hetan husi GASS hamutuk $10.000,00 ne’ebé sei fó formasaun ba joven sira iha postu haat hanesan Vikeke Vila, Lakluta, Ossú no Uatulari,” nia hato’o.
Nia esplika matéria ba formasaun mak hanesan étika morál, lei ka nórma sira no boa governasaun nian. Juventude hamutuk na’in-25 mak sei partisipa iha formasaun ne’e, formadór iha na’in-haat (4) no formasaun durante loron lima.
Entretantu, Xefe Suku Uma Ki’k, Claudino Amaral hato’o agradesimentu ba Sentru Juventude Vikeke ne’ebé eskolla Suku Uma Ki’ik hodi oferese formasaun edukasaun sívika ba joven sira.
“Ha’u husu joven sira tdnke aproveita formasaun edukasaun sívika sira-ne’e hodi tranzmite ba ita-nia maluk juventude ne’ebé mak la partisipa iha formasaun ida-ne’e,” nia haklaken.
Abertura formasaun ne’e partisipa husi autoridade lokál, funsionáriu Postu Vikeke Vila, Konsellu Suku Uma Ki’ik no komunidade.
Jornalista: Vitorino Lopez da Costa
Editór: Xisto Freitas da Piedade
