Telemor koopera ho EDTL, E.P iha transasaun eletróniku pulsa eletrisidade
DILI, 22 Jullu 2025 (TATOLI)—Telemor Fintech asina ona parseria estratéjiku ho Eletricidade de Timor-Leste, Empreza Públika (EDTL, E.P) iha transasaun eletróniku pulsa eletrisidade liuhusi karteira eletrónika prinsipál ‘Mosan’, nune’e marka viajen foun ba transformasaun dijitál iha Timor-Leste.
Ministru Obra Públika, Samuel Marcal, agradese ba partisipasaun Telemor liuhusi fasilidade eletrónika hanesan Mosan.
“Sosa pulsa liuhusi Mosan fásil liu no espera ba oin ita sei serbisu hamutuk integradu hodi dezenvolve ekonomia Timor-Leste nian ba oin,” Ministru hato’o iha salaun OKA, Hudi-Laran, Tersa ne’e.
Maneira atu asesu ba fasilidade ne’e maka kliente sira bele download aplikasaun Mosan hodi rejista no hatama osan ba konta, nune’e ajente responsável sira prontu ajuda rejistu konta Mosan, depózitu osan, no sosa eletrisidade.
Prezidente Konsellu Administrasaun EDTL, E.P, Paulo da Silva, fasilidade ne’e hanesan meiu ida halo tranzasaun sosa no fa’an pulsa eletrisidade online ho parseiru Telemor – Mosan.
“Hanesan meiu ida atu oferese ba kliente (públiku) atu hafasil no konvensionál bainhira sosa pulsa eletrisidade iha kualker tempu. Hahú agora download aplikasaun Mosan iha telefone atubele hafasil ita-nia moris,” nia katak.
Notísia relevante : Ajénsia Mosan sei halo pagamentu ba “bolsa da mãe jerasaun foun”
Parseria ne’e permite EDTL atu habelar nia alkanse no fornese asesu ne’ebé inkluzivu liután ba servisu eletrisidade esensiál sira, partikularmente ba ema sira ne’ebé hela iha área rurál. Ho ninia rede ne’ebé fonese no teknolojia ne’ebé avansadu ba utilizadór, Mosan serve hanesan liman-fuan ida ne’ebé luan ba EDTL, hodi lori servisu públiku vitál sira besik liután ba uma-kain ida-idak.
Iha biban hanesan, CEO Telemor, Vu Duc Nguyen ‘Ethan’, hateten, empeza ne’e sempre tau prioridade ba komunidade atu asesu moris di’ak.
“Ami nafatin kontinua ho marka ne’ebé kria ho kuidadu, kreatividade no determinasaun, hetan futuru diak hamutuk ho EDTL, ami servisu maka’as atu halo posível atu sosa eletrisidade iha tempu saida de’it — diretamente husi telefone de’it,” nia tenik.
La’ós atu permite de’it pagamentu dijitál , Mosan hadi’a ho ativu ema timoroan sira-nia moris, pasu ba pasu, liuhusi teknolojia. Ho Mosan, utilizadór sira bele asesu servisu barak hanesan.
Manda osan husi MoneyGram Simu osan direita iha konta Mosan, Sosa pulsa no pakote, sosa lotaria,pagamentu propinas eskola, halo pagamentu ho QR code no seluk tan.
Husi kolaborasaun ida ne subliña katak Mosan nafatin kontinua lidera konstrusaun ekonomia dijitál ne’ebé inkluzivu no konektadu iha Timor-Leste.
Telemor Fintech no Mosan nafatin komprometidu atu serbisu hamutuk ho ministériu sira, ajénsia sira, no parseiru internasionál sira hodi dezenvolve tan solusaun dijitál ho objetivu ida de’it atu timoroan avansadu ba iha teknolojia.
Liuhusi parseria ida-ne’e, Mosan agora sai hanesan kanál pagamentu dijitál ofisiál ba konta eletrisidade nian. Kliente sira iha Timor-Leste tomak bele sosa eletrisidade ho fasil iha tempu ne’ebé de’it, iha fatin ne’ebé de’it, simplesmente uza aplikasaun Mosan iha sira-nia telemóvel. Inisiativa ida-ne’e halakon nesesidade atu viajen ba dook, hein kleur.
TATOLI
