DILI, 22 Jullu 2025 (TATOLI)–Treinadór Atleta Modalidade Taekwondo, Kim ki Tae sente orgullu no louva ho atleta na’n-haat ne’ebé hatudu prestasaun di’ak iha Jogu Desportuvu Komunidade Nasaun Lian Portugés (CPLP-sigla portugeza).
Kim ki Tae hateten prestasaun ne’ebé atleta sira hatudu rezultadu husi dedikasaun, disiplina no treinu másimu iha-ne’ebé durante preparasaun nia parte fó matéria téknika, fizika inklui mentál mezmu menus try out.
“Ha’u orgullu ho sira-nia prestasaun,” Kim Ki Tae informa ba TATOLI iha Jináziu Dili, Tersa ne’e.
Notísia relevante: Atleta Taekwondo Siera Pinto gaña medalla osan-mean iha Jogu CPLP
Kim esplika nia parte sempre fó motivasaun ba atleta sira antes no hafoin hala’o jogu iha-ne’ebé atleta adversária sira hanesan Portugál kategoria hanesan atleta profisionál.
Timor-Leste nia modalidade Taekwondo hamutuk atleta na’in-haat kompostu husi feto rua, Deofia Barreto kategoria númeru kilógrama 46 no Siera Pinto kilógrama 49, enkuantu atleta rua mane hanesan Nélio dos Santos kilógrama 55 no Denilton Pereira iha kategoria númeru kilógrama 51.
Medalla haat referida gaña husi Atleta Deofia Barreto konkista medalla osan-mean ida (1), Siera Pinto konkista medalla osan-mean ida (1), entretantu atleta mane Nélio dos Santos rekolla medalla osan-mutin ida (1) no Denilton rekolla medalla osan-metan ida (1).
Jornalista: Natalino Belo
Editór: Xisto Freitas da Piedade
