DILI, 23 Jullu 2025 (TATOLI) –Treinadór modalidade tenis husi Angola, Duda Fortunato, rekomenda arbitru, inklui ajudante (ball boys no ball girl) husi modalidade tenis, iha Timor-Leste, presiza tuir formasaun nune’e bele kapasita no reforsa aan liután iha área referida tanba konsidera ladun profisionál, nune’e sira lakon pontu balun.
“Maibé nia mós ema. Nia bele halo sala, loos ka lae? Ema hotu halo sala. No, ami fiar katak bola ida ka rua maka lakon, no ha’u hanoin katak ida-ne’e hanesan jogu di’ak ida,” treinadór angolanu ne’e dehan iha Kampu tenis, UNTL, ohin.
Nia énfaze, ida-ne’e hanesan frakeza balun, nune’e rekomenda atu arbitru no ho ajudante sira presiza iha tan formasaun kona-ba arbitrajen nian.
“Iha joven ne’ebé barak tebes no ha’u fiar katak se sira investe liu iha arbitrajen, ita sei haree buat di’ak barak iha futuru liu-liu iha torneiu sira tuirmai,” nia hateten.
Maske nune’e, tuir Treinadór Duda Fortunato katak parte Angola nafatin agradese Timor-Leste tanba konsidera jogu, iha ámbitu jogu CPLP ne’e, sempre iha manan no lakon. Maibé, amizade entre Timor-Leste ho Angola kontinua metin.
“Ami só bele agradese de’it ba apoiu husi Timor-Leste ba ospitalidade, hela fatin no atendementu sira hotu ho di’ak. Iha jogu sempre iha lakon no manán, maibé amizade entre nasaun rua sei kontinua ba oin nafatin. Ohin ami manán, aban ami bele lakon, maibé saida maka importante maka jogu justu ba labarik sira no amizade”, nia agradese no otimista.
Iha fatin hanesan, Prezidente Federasaun Tenis Timor-Leste, João José Madeira Martires, afirma, ball boys no ball girl nafatin esforsu atu tau matan ba jogu ne’e sai di’ak no justu ba ema hotu-hotu maibé nu’udár umanu sempre iha falla. Maske nune’e sira sei nafatin esforsu atu hadi’a di’ak liután iha jogu sira tuirmai.
“Ita-nia joven sira-ne’e partisipa iha treinamentu, maibé nu’udar umanu sempre falla iha momentu balun, tanba ne’e mak iha arbitru sira, se la justu iha arbitru sira atu haree, maibé ita nafatin esforsu atu jogu ne’e sai justu ba hotu-hotu la’ós de’it ba Timór”, prezidente ne’e rekoñese.
Kona-ba preokupasaun husi delegasaun Angola ne’e, tuir autoridade ne’e, sei iha konsellu arbitrajen ne’ebé mak tau matan ba asuntu ida-ne’e. Purtantu partisipante sira-nia nia haree ne’e dalaruma diferente maibé iha jogu ne’ebé de’it sempre iha regra, entaun la’ós tuir regra hotu ne’ebé estabelesida ona.
“Preokupasaun husi Angola ne’e ita iha konsellu arbitrajen iha ne’e atu haree, partisipante sira-nia haree dalaruma diferente, maibé ita nafatin iha regra balun ne’ebé ita tuir. No, ida-ne’e ita aprende atu loron seluk ita ba ema-nia rai tuir torneiu ka ema mai ita-nia rai tuir torneiu ita sei aplika regra sira-ne’e nafatin. Ita la’ós perfeitu maibé ita-nia atendementu durante ne’e la’o di’ak loos”, nia konsidera.
Entretantu, ball boy no ball girl ne’ebé apoiu iha modalidade tenis durante iha jogu eventu desportiva jogu CPLP ne’e hamutuk 18, inklui ho feto.
Jornalista : Felicidade Ximenes
Editór: Rafael Ximenes de A. Belo
