VIKEKE, 23 Jullu 2025 (TATOLI)—Xefe Suku Ahik, Postu Administrativu Lakluta, Munisípiu Vikeke, Ercílio Soares preokupa ho eletrisidade ne’ebé liga bá Suku Ahik daudaun ne’e avariadu.
“Tinan kotuk kedas ami-nia eletrisidade avaria no agora mós kontinua avaria. Maibé, parte empreza responsavel no Eletricidade de Timor-Leste, Empreza Públika (EDTL,E.P.) seidauk mai halo manutensaun. Parte suku Ahik nian agora ahi lakan hela, liña mai ami-nia suku mak la lakan kuaze semana ida ona,” Ercílio Soares ba TATOLI iha Postu Administrativu Lakluta, Kuarta ne’e.
Autoridade ne’e hatutan katak kona-ba kestaun ne’e sira informa ona ba EDTL, maibé seidauk mai halo manutensaun no agora komunidade sira halerik loos ba eletrisidade.
“Ha’u fó hatene ona parte EDTL, maibé sira dehan projetu ba Suku Ahik sei iha faze retensaun, ne’ebé parte empreza mak responsavel. Tan ne’e, ha’u hakarak husu ba empreza responsavel no EDTL bá halo manutensaun atu ami-nia komunidade bele asesu fali eletrisidade,” nia hato’o.
Hatán ba preokupasaun ne’e, Koordenadór EDTL, E.P, Ernesto Sarmento esplika katak eletrisidade avaria kauza husi izolatór mak rahun, ne’ebé EDTL Munisípiu Vikeke informa ona ba EDTL nasionál atu koordena ho empreza hodi halo manutenaun.
“Ohin ha’u informa ona ba Komisáriu Ezekutivu EDTL nasionál, ne’ebé komisáriu fó-hatene fali ba ha’u katak sei bolu empreza hodi bá halo manutensaun ba eletrisidade ne’ebé avaria iha Suku Ahik,” nia haktuir.
Projetu eletrifikasaun iha suku referidu hahú iha tinan 2022 no 2023. Projetu eletrifikasaun ne’e responsabiliza husi empreza Uaitau Unip, Lda no empreza Carnesia Unip, Lda. Tuir dadus, Suku Ahic iha uma-kain 450 mak asesu eletrisidade.
Jornalista: Vitorino Lopez da Costa
Editór: Xisto Freitas da Piedade
