BTL Vikeke rekolla taxa bee-moos rihun $12 durante fulan hitu
VIKEKE, 23 Jullu 2025 (TATOLI)—Koordenadór Bee Timor-Leste, Empreza Públika (BTL, E.P.), Marito da Costa informa katak BTL, E.P. Munisípiu Vikeke husi fulan-Janeiru to’o fulan-Jullu rekolla taxa bee-moos hamutuk $12.916,70 ba kofre Estadu.
“Reseita hirak-ne’e maihusi ita-nia kliente sira-ne’ebé asesu bee-moos liuhusi kontadór ne’ebé ami monta iha kada uma-kain sira, iha Postu Vikeke Vila,” Marito da Costa ba TATOLI iha nia kna’ar fatin, Kuarta ne’e.
Nia esplika katak uma-kain hamutuk 703 mak kontribui reseita no foin lalais mota tan kontadór unidade 12 iha zona Beloi.
Marito tenik katak dezafiu ne’ebé BTL enfrenta mak kanu distribuisaun bee-moos no tanke rezervatóriu ho kapasidade ki’ik, ne’ebé difikulta distribui bee bá komunidade.
“Ita-nia kanu sira kuaze antigu ona iha rai okos, balun ko’ak beibeik. Ami fahe bee ba komunidade fahe loron, atu komunidade bele asesu. Dezafiu sira-ne’e ami relata hotu ona ba nasionál atu haree,” nia hato’o.
Tuir dadus, taxa kada fulan hahú husi fulan-Janeiru rezulta $2.444,00, Fevereiru $2.703,20, Marsu $2.012,00, Abríl $1.923,00, Maiu $1.210,45 no Juñu $1.622.00 no Jullu $1.002,05.
Enkuantu, daudaun ne’e funsionáriu BTL Munisípiu Vikeke hamutuk na’in-14 kompostu husi koordenadór, tékniku operasionál no administrasaun ne’ebé ativu atende komunidade Vikeke Vila.
Jornalista: Vitorino Lopez da Costa
Editór: Xisto Freitas da Piedade
