Ekipa basketeból Timor-Leste mane no feto kontinua sofre derota

DILI, 23 Jullu 2025 (TATOLI)-Ekipa basketeból U-16 mane no feto ne’ebé partisipa iha jogu desportivu Komunidade Nasaun sira ne’ebé ko’alia lian-portugés (CPLP, sigla portugés) kontinua sofre derota bainhira hasoru Nasaun amigu sira iha kampu.

Abertura basketeból ekipa feto Timor kontra Mosambike ne’ebé hala’o iha Jináziu Dili, hahú tuku 15:30 ho jogadór TL mak Tereza Diandra ho kamizola-7, Maria Auxiladora númeru kamizola- 4, Rozita Flarista ho númeru kamizola- 7 no Rosa Moza númeru kamizola- 12, husi haat ne’e, ida suplente.

Ekipa Mosambike kompostu husi jogadór Nisha Antonia Valdes, Lunyaira Sansao dumangane, Isis Leo Maulule no Afryca Edna, ida suplente. Jogu ne’e prezide husi árbitru Isabel de Pedro husi Angola no Samuel Moreno husi Kabuverde.

Durante jogu Mosambike domina jogu no lafó fatin ba adversáriu. Ho postura ne’ebé kiik no mentál ne’ebé ladún di’ak halo ekipa feto Timor-Leste joga ho ritmu neneik, nune’e Mosambikana sira aproveita domina, nune’e jogu seidauk minute-lima, amigo sira ne’e rekolla ona pontu 11 no bainhira jogu konklui rekolla pontu 20 no ekipa uma-na’in hela ho zero.

Iha tuku 18:30 ekipa basketeból feto Timor-Leste kontinua joga hasoru ekipa Kabuverde. Jogu ne’e ekipa feto Timor-Leste lidera husi kapitaun, Maria Auxiladora Ximenes, hatudu jogu ne’ebé di’ak tebes, tanba konsege enkoraja na’in-rua seluk halo mudansa ba jogu, nune’e iha jogu daruak ho Kabuverde, ekipa uma-na’in konsege lansa pontu tolu no Kabuverde rekolla pontu 21.

Enkuantu ekipa mane, Timor-Leste hasoru Kabuverde iha tuku 16:30 iha Jináziu Dili, kuarta ohin, uma na’in rekolla de’it pontu lima enkuantu ekipa adversáriu rekolla pontu 21, nune’e ekipa uma-na’in obrigadu rekoñese kapasidade jogadór husi Kabuverde, tanba sai vensedór iha jogu ne’e.

Rezultadu sira-ne’e, ekipa mane no feto lakon dala-rua ona no seidauk manán dala-ida ho adversáriu sira.

Kapitaun ekipa feto TL, Maria Auxiladora Ximenes, hateten sira lakon ho ekipa adversáriu tanba fatór fiziku. “Ami ohin joga ne’e, ami koko duni ami-nia forsa, maibé ami-nia forma to’o hanesan ne’e. Ami husu deskulpa ba Timor tomak katak ami labele manán jogu ne’e, maibé seluk ami sei manán”, Maria ba Tatoli hafoin jogu iha Jináziu, kuarta-ne’e.

Tuir nia, ekipa adversáriu sira bem preparadu. “Ami sente lakon, maibé ami sente triste uituan tanba ami hatene katak ami labele. Ami nia forsa mak ohin ne’e duni, tanba sira (ekipa Mosambike no Angola) forsa liu duni ami no sira ne’e realidade katak bem preparadu no ba sira ne’e hobby duni, kompara ami ne’ebé foin treinu basketeból iha fulan-Fevereiru ne’e.Tanba ne’e, ha’u atu ko’alia katak sira forsa liu ami duni entermu fiziku no mentál liu hotu ami. Ami fiziku ne’e la to’o sira”.

Nia dehan, realidade hatadu Mosambike no Angola soke ekipa nasionál monu tanba iha jogadór feto na’in-rua monu bainhira hadau malu bola.

“Maski nune’e ha’u kontente nafatin tanba bele reprezenta Estadu Timor-Leste partisipa jogu CPLP ne’e. Buat sira la atinji no  ba oin ami sei hadia hodi mellora liu, nune’e tempu ruma ita mós manán”, nia konklui.

Iha fatin hanesan, jogadór basketeból feto Timor-Leste, Rosa Moza Maria da Silva Guterres, hateten maski lakon maibé kontinua motiva kolega sira atu hatudu jogu ne’ebé di’ak no koko kontinua joga tanba manán lakon ne’e normál.

Jogadór basketeból mane, José Fernandes dos Santos, hateten sente triste tanba rezultadu jogu daruak ba basketeból lakon.

“Ami konsentra katak ida-ne’e ami iha frakeza passing (soe bola ba kolega) no shoot (hatama bola ba rede) mak seidauk di’ak, aumenta ho ami-nia fiziku, mak lakon. Buat sira ne’e ami sei hadia”, nia afirma.

Kapitáun ekipa jogadora Mosambike, Afryca Edna, hateten kontente maske jogu ne’e iha manán no lakon, maibé importante mak kria amizade ne’ebé di’ak liután.

Treinadora basketeból feto, Ana Lemos, hateten desde jogu hahú, estremamente difísil maibé divertivu no atrativu tanba bele dada antuziasmu komunidade asiste.

Nia dehan, maski jogu ne’e iha de’it minutu 10 maibé diverte ema tebes, espera hotu bele mellora liután jogu ba aban nian.

Entratantu iha kinta (24/7) aban tuir oráriu, ekipa uma na’in mane sei hasoru ekipa Portugal iha Jináziu tuku 17:00-17:30 no ekipa feto Timor-Leste sei kontra Portugal iha tuku 16:00-16:30, hafoin ne’e kontinua hasoru ekipa husi Kabuverde iha tuku 17: 30- 18:00.

Notísia relevante: Timor-Leste derrota iha basketeból bainhira kontra Angola

Jornalista       : Natalino Costa

Editora           : Rita Almeida