DILI, 23 Jullu 2025 (TATOLI) – Iha apoiante sira nia haksolok no entuziazmu, Atleta Xadrez Timor-Leste, Noelio Garcia Menezes manán medalla bronze ba nia nasaun iha kategoria Xadrez Rápidu Mane iha Jogu Desportivu CPLP XII, ne’ebé hala’o iha Sentru Dili Konvensaun (CCD) iha loron 22 no 22 jullu 2025.
Noelio, ho de’it idade 11, hala’o ho konfiansa iha ronda lima hasoru jogadór joven sira hosi nasaun luzófonu sira. Ho pontu tolu, nia termina ba terseiru lugar iha Portugál no Angola nia kotuk, ho susesu lori Timor-Leste ba pódiu.
“Hau sente kontente se wainhira lori Timor ba oin. Ha’u sente diak bele kompete ho kolega husi nasaun CPLP sira, ha’u aprende buat barak husi sira no aumenta ha’u nia koñesimentu no bele hadia iha futuru,” Noelio hatete ba jornalista sira hafoin simu nia medalla.
Mai husi Posto Administrativa Laclo, Munisípiu Manatuto, Noelio hahú nia viajen xadrez ho idade tinan 6, aprende diretamente husi nia avó, Tomás Fernandes. Agora nia hela iha Dili no eskola iha Bemori, kontinua fahe nia tempu entre estuda no pratika.
“Avo Pai mak hanorin hau bainhira tama eskola primaria klase 1, Primeiru hare’e sente ladun kompriende. Halimar Xadrez gaya tebes. Ho, espíritu aas, ha’u rekoñese katak la tauk kompetisaun no hakarak dezenvolve nafatin hamutuk ho atleta CPLP sira seluk,” nia dehan.
Noelio nia inan, Francisca Garcia, ne’ebé akompaña nia oan mane iha torneiu tomak, labele subar nia emosaun kontente.
” Hau sente kontente tebes no la haluha hato’o obrigada ba governu Timor-Leste no ekipa Xadrez tomak durante fulan hirak nia laran akompaña nia to’o ohin loron hodi halao kompetisaun ida ne’e. Hau fo apoiu no suporta nafatin ba oin”, nia hatete.
Atleta Xadrez Timor-Leste, Noelio Garcia Menezes simu medalla bronze iha jogu kategoria Xadrez. Imajen Tatoli/Cidalia Fatima
Entretantu, treinadór Xadrez Timor-Leste Andrade Pinto dehan realizasaun Noelio nian ne’e nu’udar espíritu foun ba jerasaun joven jogadór xadrez iha rai-laran.
“Esperansa ba futuru sai motivasaun ba alin sira tuir mai. Maske terseiru lugar maibe espera sai motivasaun diak ba atleta xadrizta junior hotu iha Timor nune’e bele kompriende no treinu,” nia subliña.
Nia mos hatutan, susesu ida ne’e hanesan sinal ida ba governu atu fo atensaun liu ba xadrez hanesan desportu nasional ne’ebe iha potensia.
Kompetisaun Xadrez Rápida Mane CPLP XII hala’o iha ronda lima iha loron 22–23 fulan-jullu tinan 2025. Rezultadu finál maka :
- Portugál – pontu 5 (medalha osan-mean)
- Angola – pontu 4 (medalha osan-mutin)
- Timor-Leste – pontu 3 (medalha bronze)
- São Tomé e Prínsipe – pontu 1
- Cabo verde – pontu 1
- Mozambike – pontu 1
Portugál hetan pontu kompletu hafoin halakon adversáriu haat no hetan pontu adisionál ida hosi inísiu tarde Mosambike nian iha jornada finál. Noelio rasik rejista vitória krusiál tolu ne’ebé dudu Timor-Leste ba terseiru lugar.
Torneiu xadrez CPLP XII tinan ne’e inklui kategoria prinsipál tolu : Padraun, Rápidu, no Blitz, no hala’o iha loron 21 to’o 25 fulan-jullu tinan 2025. Jogu sira ofisializa hosi árbitru nasionál na’in sia hosi Timor-Leste no árbitru internasionál na’in haat hosi Portugál, São Tomé e Prínsipe, no Cabo Verde.
Hafoin kompetisaun, atleta sira simu sira nia medalla husi reprezentante governu Timor-Leste hanesan Ministru Justisa Sérgio Hornai, Vise-Ministra ba Asuntu ASEAN Milena Rangel, no Koordenadór Jerál Kompetisaun CPLP nomos nu’udar Sekretáriu Estadu Arte no Kultura, Jorge Cristovão.
Reprezentante Federasaun Xadrez Internasionál (FIDE) no Prezidente Federasaun Xadrez Cabo Verde nian, Francisco Carapinha, Prezidente Federasaun Xadrez Timor-Leste (FXTL), Zeferino Viegas, no Embaixadór Angola iha Timor-Leste, José Andrade de Lemos, mós marka prezensa.
Jornalista : Cidalia Fátima
Editora : Armandina Moniz
