DILI, 23 Jullu 2025 (TATOLI) – Governu Korea liuhusi Ajénsia Kooperasaun Internasionál Korea nian (KOICA, sigla inglés) halo koperasaun ho Governu Timor-Leste liuhusi Ministériu Juventude, Desportu, Arte no Kultura (MJDAK) hodi realiza kursu formasaun mentor ka mentor traning course ba estudante sira husi Departamentu Desportu husi Universidade Nasionál Timor Lorosa’e (UNTL).
Jerente Kampu husi KODAC (KOICA PMC), Suweon Lim, fó hanoin ba estudante sira husi Departamentu Desportu UNTL hodi enkoraja hasa’e idak-idak nia abilidade, liuliu iha koñesimentu no profisionalizmu iha área relevante.
“Sai mentor la’ós fasil, presiza iha kapasidade atu kompreende no entende estudante, labarik sira-nia karaterístika, oinsá atubele apoiu mentee (estudantes/labarik) sira-nia kresimentu no dezenvolvimentu bazeia ba ita-nia esperiénsia no koñesimentu,” refere nota imprensa ne’ebé Ajénsia TATOLI, asesa husi relasaun públika KOICA nian, tersa ne’e.
“Mentor tenke iha mós abilidade oinsá atu fó konsellu no enkoraja, liuliu fó ezemplár di’ak ba mentee (estudantes/labarik) sira liuhusi ita-nia komportamentu ka asaun no linguajen.”
Mentor traning course (kursu formasaun ba mentor) ne’e hahú ona husi tinan 2022 até 2025, foka liu ba estudante universidade ka foin-sae sira-ne’ebé iha paixaun ba dezenvolvimentu pesoál no profisionalizmu, liuhusi programa desportu ida-ne’e, bele fó oportunidade ba partisipante sira atu hetan kapasidade, disiplina, lideransa, no fasilita dalan ba futuru ne’ebé di’ak. Formasaun ne’e hala’o iha loron 19 fulan-Jullu liubá.
Mentoria maka patrosíniu, influénsia, orientasaun, ka diresaun ne’ebé fó hosi mentor ida. Mentor maka ema ida-ne’ebé hanorin ka fó tulun no konsellu ba ema-ne’ebé ladún iha esperiénsia no dala barak joven liu.
Iha ambiente organizasionál, mentor ida influénsia kresimentu pesoál no profisionál husi mentee ida. Maioria mentorizasaun tradisionál sira envolve iha funsionáriu seniór sira-ne’ebé mentoriza funsionáriu juniór sira, maibé mentor sira la nesesariamente tenke sai seniór liu duké ema sira-ne’ebé sira mentoriza.
TATOLI
