DILI, 22 Jullu 2025 (TATOLI) – Iha loron datoluk, Tenista feminina Timor-Leste Graciabeth Valosa hamonu matan-been tanba lakon iha kompetisaun ba modalidade tenis ho Tenista femenina Angolana Filomena Gonçalves, iha kampu tenis, besik Kampus UNTL, Dili, ohin.
Kompetisaun ne’ebé lidera hosi arbitru Timor-Leste, António Mendez, iha set dahuluk, Tenista Femenina Timor-Leste hetan skór ida (1), enkuantu Femenina Angola neen (6). Depois, ho abilidade, esperiénsia no esforsu aan, tenista timoroan iha jogu ida-ne’e ho set daruak neen (6) femenina Angolana tuun ba haat (4).
Nune’e iha set datoluk femenina Timor-Leste ho esforsu tomak domina kampu atu manan iha loron datoluk maibé femenina Angolana ho kapasidade individuál ne’ebé iha, nafatin mantein ho posizaun atuál nune’e to’o minutu ikus tenista Angolana sai konkistadora ho skór 10. Nune’e, vitória, tenke pertense ba Tenista Angola. Enkuantu, Timor-Leste ho skór ualu (8). Ho realidade, Tenista feminina Timor-Leste Graciabeth Valosa hamonu matan-been, iha kampu-laran.
“Ha’u mós esforsu maka’as atu manan maibé iha minutu ikus nia halakon ha’u. Nune’e, ha’u triste tebes mak ha’u hamonu matan-been,” nia hato’o.
Enkuantu, Tenista feminina Angolana, Filomena Gonçalves, manan-na’in iha kompetisaun ho nia adversária timorense ne’e konfirma razaun nia sai manan-na’in.
“Iha primeiru jogu ne’e ha’u-nia adversáriu joga di’ak, depois iha set daruak ne’e ha’u-nia adversáriu maka’as liu. Entaun, husi ne’e ha’u esforsu maka’as iha minutu ikus, ha’u manan,” Filomena Goncalves haktuir.
Iha jogu tenis kampu ne’e hahú iha tuku 17:09 no ramata iha tuku 18:45 ne’ebé hala’o iha Kampu B UNTL sentrál Dili.
Iha oras ne’ebé hanesan femenina Portugal hasoru femenina Mosambiké iha kampu A UNTL sentrál.
Husi jogu referidu femenina Portugal ho naran Sofia Ferreira defronta hasoru femenina Mosambiké ho naran Leticia Jandamel husi ne’e set dahuluk Portugal neen (6) no Mosambiké (2), depois iha set daruak Portugal mantein neen (6), Mosambiké ida (1), nune’e femenina Portugal lori vitória ho modalidade tenis. Husi jogu ne’e arbitu husi Timoroan ho naran Patrício Fereira.
Jornalista : Felicidade Ximenes
Editór: Rafael Ximenes de A. Belo
