BOBONARU, 23 Jullu 2025 (TATOLI)—Projetu Programa Nasionál Dezenvolvimentu Suku (PNDS) tinan 2024 iha Suku Lebos, Postu Administrativu Lolotoe ho Suku Maleubu la’o hikas fali hafoin paradu iha fulan-Dezembru tinan kotuk, enkuantu projetu 13 mak la konsege finalizadu tanba kondisaun klima ladi’ak.
Diretór Servisu Munisipál Apoia PNDS Autoridade Munisípiu Bobonaru, Rosário Mali informa katak projetu rua ne’e la’o hikas tanba líder komunitáriu ho membru konsellu suku sira deside aloka fali orsamentu tinan 2025 hodi finaliza obra ne’e.
“Projetu rua la’o fali ho orsamentu 2025, enkuantu orsamentu ba projetu 13 fila tiha ona ba kofre Estadu. Agora, atu foti desizaun kona-ba kontinuasaun projetu referidu ne’e membru konsellu suku ho xefe suku sira,” nia informa ba jornalista sira iha nia kna’ar fatin, Kuarta ne’e.
Diretór PNDS hatutan katak antes ne’e Munisípiu Bobonaru iha projetu 18 mak la carry over iha tinan 2024, maibé projetu balun ne’ebé ninia progresu fizíku atinje ona 90% foin lalais ne’e, komunidade servisu hamutuk ho ekipa PNDS no suku konsege finaliza liuhusi utiliza materiál restu.
“Antes ne’e ita iha projetu 18 maibé agora ita redús ba 13 ona,” tenik Responsavel PNDS Munisípiu Bobonaru ne’e.
Rosário esplika projetu 13 ho tipu konstrusaun estrada rurál no seluk tan, maibé barak liu konstrusaun eskola hanesan iha Suku Ritabu, Postu Administrativu Maliana, Suku Oe-leu, Suku Leber no Suku Tebabui, Postu Administrativu Bobonaru.
Rosário Mali fundamenta katak projetu carry over hirak-ne’e barak liu iha Postu Administrativu Lolotoe no Postu Bobonaru.
“Tanba ita hatene iha 2024 ne’e ita nia klima iha mudansa. To’o Agostu, Novembru, Setembru no Outubru mós sei udan. Depoiz dalan kotu prejudika ita lori materiál ba iha fatin projetu ne’e susar lahalimar. Lolotoe ne’e até agora ita seidauk asesu ho di’ak, dalan kotu. Ita bá iha postu de’it susar tiha ona satán ita bá suku no aldeia,” nia dehan.
Enkuantu, iha tinan 2025 ne’e, Servisu Munisipál Apoiu PNDS hetan alokasaun orsamentu hamutuk $1.817.733. Husi montante ne’e, $1.635.597 aloka bá infraestrutura no $1.81.733 aloka ba operasionál no orsamentu atu finansia ba projetu 50 ne’ebé klasifika ba setór sira hanesan dalan, ponte no kontrolu seias hamutuk 35, setór bee-moos (6), saúde (4) no setór edukasaun (5).
Jornalista: Sergio da Cruz
Editór: Xisto Freitas da Piedade
