DILI, 23 Jullu 2025 (TATOLI) – Prezidente Tribunál Rekursu (PTR), Afonso Carmona hatún ona desizaun katak edifisiu tuan Tribunál Distritál Dili ne’ebé lokaliza iha Kolmera, provizória utiliza ba instalasaun Supremu Tribunál Justisa (STJ).
Nia esplika, planu harii Supremu Tribunál ne’e kle’ur ona no oras ne’e progresu hahú ho konsulta públika liuhusi semináriu, ne’ebé hahú ona iha lorin 01 Jullu 2025.
“Ita promete to’o dezembru buat hotuhotu tenke ser hotu no janeiru 2026 ne’e ita tenke tuir ona pedidu Prezidente Repúblika nian katak Supremu Tribunál tenke la’o ona. Tanba Prezidente Repúblika hakarak to’o iha fulan-maiu 2026 tenke estabelese ona Supremu Tribunál,” Afonso Carmona, ko’alia iha Kakoli, kuarta ne’e.
Eforsu hirak-ne’e, Prezidente Tribunál Rekursu informa ona ba Prezidente Repúblika, José Ramos Horta, kona-ba fatin atu halo instalasaun Supremu Tribunál iha Kolmera, Dili.
“Ita sei uza Tribunál tuan iha Kolmera hodi instala provizóriu Supremu Tribunál, agora daudaun ekipa tékniku Tribunál Rekursu hahú hadi’a fatin Tribunál tuan, Kolmera, hadi’a kondisaun sira nune’e ba oin bele uza ona fatin ne’e Supremu Tribunál Justisa,” nia katak.
Nia fó-sai katak, oras ne’e tékniku no funsionariu Tribunál Rekursu hahú hadia fatin ne’e hodi prepara ba funsionamentu Supremu Tribunál.
“Ha’u atu dehan fatin fiksu ona no tempu ona ita instala Supremu Tribunál Justisa. Fatin ne’ebá ne’e ita sei uza temporáriu to’o konstrusaun edifísiu permanente ba Supremu Tribunál Justisa,” nia informa.
Jornalista: Natalino Costa
Editór: Evaristo Soares Martins
