DILI, 23 Jullu 2025 (TATOLI)—Iha kompetisaun Voleiból Praia Jogu Desportivu Komunidade País Lian Portugés (CPLP, sigla portugés), ekipa mista Portugál halakon Kabuverde ho set rua, nune’e Portugál hakat bá finál.
Iha kompetisaun ne’e, ekipa Portugál reprezenta Filipe Neto no Matilde Silva, enkuantu Kabuverde reprezenta husi Catarina Fonseca ho Denzel Ramos.
Ekipa mista entre parte rua esforsu ho ida-idak nia tátika no maneira oinsá atu gaña iha semifinál ne’e, maibé rezultadu ne’ebé hatudu iha set dahuluk Portugál gaña ho pontu 21 no Kabuverde 14.
Iha set daruak, ekipa rua nafatin esforsu Portugál konsege hetan vitória pontu 21, Kabuverde 10, nune’e Portugál hetan vitória ho set rua 42 no 24.
Notísia relevante : Ekipa Portugál vense Kabuverde iha Voleiból Praia Mista
Jogadór husi Portugál, Filipe Neto, dehan, nia ekipa preparadu iha eventu desportivu jogu CPLP ba dala-XII.
“Ami iha preparasaun ne’ebé eselente, hanesan ita-boot bele haree, ami joga set sira ne’ebé ladún ekilibradu. Ida-ne’e maka jogu ida-ne’ebé maka monu maka’as ba ami-nia sorin, no ami konsege impoin ami-nia serbisu ba arma ida ne’ebé maka’as. Ami halo ekipa adversáriu nia jogu sai difísil,” Filipe Neto hato’o ba jornalista sira, iha kampu Voleiból Praia, Bidau-Lesidere, Kuarta ne’e.
Tuir nia, Portugál nia adversáriu mesak fraku no ida-ne’e ekipa bele aproveita hodi uza tátika ne’ebé iha nune’e hamonu sira iha set rua tuituir malu
“Tanba ami-nia serve laiha difikuldade barak iha jogu, lahó dúvida, ami-nia serve maka buat ne’ebé maka manán ami-nia jogu sira no halo ekipa seluk nia jogu sai difísil liután,” nia katak.
Jornalista : Osória Marques
Editora : Julia Chatarina
