DILI, 24 Jullu 2025 (TATOLI) – Governu Austrália hatudu nia prontidaun atu tulun Timor-Leste halo jestaun ba Lafaek sira iha Tasi Timor-Leste (TL), ne’ebé iha tempu barak fó ameasa ba moris povu no peskadór sira.
Ministra Komérsiu, Negósiu no Relasaun Aziátika Territóriu Norte Austrália, Robyn Cahill, hato’o ona prontidaun ne’e ba Primeiru-Ministru Xanana Gusmão durante reuniaun iha salaun enkontru Gabinete Fronteira Marítima no Terrettre, iha Palásiu Governu.
“Ohin nia mai atu espresa sira-nia kompromisu atu ajuda nafatin ita iha saida de’it. Ministra hatene katak, iha ne’e ita iha Lafaek barak, ita labele oho. Tanba ne’e mak sira mai ajuda ita atu jere halo oinsá iha fatin sira ne’ebé ema ba haris tasi Lafaek labele iha”, Xanana hateten hafoin ramata enkontru.
Xefe Ezekutivu esplika aleinde Austrália halo jestaun ba Lafaek, Austrália mós hakarak kontinua fó apoiu iha área edukasaun, kriasaun empregu no saúde.
Iha fatin hanesan, Robyn Cahill agradese ba Primeiru-Ministru, Xanana Gusmão, ne’ebé fó oportunidade hodi simu nia vizita.
“Primeiru-Ministru disponivel atu simu hikas ha’u-nia prezensa hodi ko’alia hamutuk kona-ba oinsá haree kooperasaun sira ne’ebé bele serbisu hamutuk, espesialmente iha jestaun ba Lafaek iha área Tasi Tióor nian”, nia hateten.
Robyn Cahill mós kontente atu serbisu hamutuk ho Governu Timor-Leste hodi hala’o tratamentu ba saúde povu iha nasaun ne’e nian.
Jornalista: Arminda Fonseca
Editora: Maria Auxiliadora
